合資新片反響好 陳山聰梁烈唯林盛斌擬開拍第二部

香港文匯報訊（記者 余雁）陳山聰、梁烈唯與林盛斌（Bob）首次合作投資、製作與主演之馬來西亞賀歲電影《媽媽又要嫁》，將於大年初一於當地正式上映，為了在開映前力谷宣傳，三人特地提早到當地不同地方造勢，力求新戲能夠在馬年票房大賣。

新戲首映日前在吉隆坡舉行，戲院外一早塞爆過千人十分墟冚，陳山聰、梁烈唯與Bob3人以中式賀年服登場，連同戲中女主角伍詠薇、馬來西亞男演員馮瑋佺提早向觀眾拜年，為隆重其事首映儀式上安排1條大龍3隻醒獅贈興，山聰更負責打鼓，炒熱了全場氣氛，山聰說：「我搵咗馬來西亞獅兄弟幫忙，本來我諗住親自上陣舞獅，但擔心搞到全身大汗唔係幾好，所以就負責打鼓，正所謂鼓聲一響震天下、黃金萬両，攞個好意頭，希望套戲都可以響遍全馬來西亞。」

今次首映禮在戲院中安排了13間放映廳，全部座無虛席，三人就跑足13間放映廳謝票，最後就同觀眾一齊睇戲，看看觀眾反應，其間聽到大家笑聲不絕，反應很好，令3人都好開心好感動，放下心頭大石，而Bob更聲稱感動到流淚。

此次宣傳之旅加首映禮，獲得很好的評價，3子完全感受到馬來西亞人的熱情，對他們來說打了一枝好大的強心針，問到會否令他們對票房加強信心，封了蝕本門，山聰說：「我哋唔敢講，當然對我身為投資者或者對其他大嘅投資者嚟講係一個好好嘅事，但係我覺得最緊要係口碑，我地每一晚各自喺酒店房度覆message覆到凌晨4、5點，全部都好正面，我哋都好感恩，都希望套戲之後有機會可以喺香港上映。」

梁烈唯談到在首映禮上看到很多馬來西亞觀眾非常熱情，他亦被感動了：「最感恩係聽返在場所有工作人員講個幾鐘頭內大家笑到好開心，由頭笑到尾，而幾個感動位，好多觀眾情緒都被牽動，唔少人都喊咗出嚟，而完場之後，好多人走嚟同我講，話好鍾意呢套戲，會喺過年嘅時候同屋企人或者朋友再去睇多一次，真係好多謝咁多位大馬嘅觀眾。」

此外在宣傳期間，山聰自爆拍攝期間之趣事：「有場戲為藝術犧牲㗎，其實嗰場戲都唔知要點收科，惟有咬Bob個屁股啦，但就算真係拉低佢條褲，相信佢都唔會介意嘅。」Bob即扮生氣回應：「突然除我條褲同咬我屁股，都好變態﹗其實如果觀眾睇咗會笑，要我做乜都冇所謂啦。」Bob更許下承諾，只要票房報捷的話，他會穿著戲中的兔女郎裝，在當地商場跑一圈謝票。

今次未開賣已先贏口碑，原來3人已立即考慮開拍第二部，並且已着手準備，他們希望能為電影圈盡一份綿力，吸引更多投資者開拍電影，令更多人有工開，令電影圈可以再發光發亮。