開腦手術後復辦生日會 筵開22席 蔡一傑與歌迷慶59歲生辰

香港文匯報訊（記者 阿祖）昨日是組合草蜢成員蔡一傑（傑少）的59歲生辰，前晚他於酒樓筵開22席，與大約300位歌迷舉行生日晚宴，穿著紅色上衣的傑少風騷出場，高呼：「我返咗嚟啦！大家好嗎？祝大家新年快樂，身體健康，今晚玩得開心、食得健康！」歌迷尖叫與歡呼，一同高舉印有傑少靚仔樣的揮春齊聲恭賀，之後傑少與全場歌迷大合照及玩熱身遊戲，歌迷贏得他精心挑選的珍藏Labubu，全場嘩聲四起。

傑少最近愛上打麻將，歌迷特別設計一款抽麻雀紙牌遊戲獲得大利是，歌迷猜台上的麻將叫「十三么」，傑少問：「隻『發財』呢？」歌迷立即指住他，他哈哈大笑說：「吓？我驚你哋甩我（摸我）呀！」之後歌迷推出「59」字樣的生日蛋糕，全場大合唱生日歌，並送上鮮花祝賀。為了參加偶像的生日會，有美國、韓國、日本、台灣、內地和馬來西亞等歌迷專程來港，傑少非常感動：「韓國嗰位Fans跟咗我差唔多26、27年，真係好耐。佢哋以前會喺電台等我，見返啲舊面孔好開心。今日都有好多阿梅（已故師父梅艷芳）嘅歌迷嚟咗，我覺得好開心，因為我哋識咗好耐。」

傑少幾乎每年都會與歌迷慶祝生日，去年因接受開腦手術沒有搞生日會，他說：「我上次開生日會係兩年前，兩年後又唔同咗，我加咗新嘅Chips，全新面貌，我覺得更加開心。做人一定要開心，要愛自己！」