「芯懿CP」買花催運 黎諾懿利是預算加碼

香港文匯報訊（記者 子棠）黎諾懿和李佳芯（Ali）主演的馬來西亞黑幫權謀劇《義和》，自開播以來口碑甚佳，令二人十分鼓舞，期望可開拍續集。為迎接馬年，祈求新一年更多「芯懿CP」合作，二人相約落區買花催運，其間吸引大批巿民圍觀合照，諾懿與Ali十分親民，來者不拒，實行大派福利。

每年新春，黎諾懿與Ali都不約而同在家擺放蘭花，為屋企增添喜慶感，黎諾懿表示：「以前新年，屋企有好多習俗，例如初一唔畀洗頭、掃地，但隨時代轉變，媽咪都唔再理，反而我自己有個習慣，就係買花，因為花有種喜慶感，我多數會買蘭花，會喜歡唔係單一顏色，白透紅就最靚。」

向來重視過年的 Ali屋企亦有不少傳統習俗：「大年初一一定去老人家屋企拜年，之前一晚細個總會去行花市，可以乘機出夜街，行到凌晨再買年花返屋企，我仲會爭住買全盒嘅糖果，因為可以買自己鍾意食嘅，糕點就必食年糕，因為好意頭，各方面都年年高嘛。」問到Ali拜年時可會擔心被催婚？她哈哈大笑說：「近十年唔怕了，因為已經有抗體，反而最怕親戚唔問，因為有部分親戚可能一年先見一兩次，所以我寧願每次見面都更新近況。」

諾懿就表示本身親戚不多，不會有尷尬問題出現，過往新年都會帶兒子去旅行，不過今年他選擇留港度歲，利是預算更會加碼，希望派給工作人員、一齊工作的同事，大家可以一齊開心。