李霖恩自嘲樂食「軟飯」 劉可邀魯振順直播合唱

香港文匯報訊（記者 梁靜儀）近期「商界」非常活躍的苑瓊丹（苑仔），宣布與眾圈中好友劉可、魯振順、鍾潔兒、李霖恩等合作直播，讓市民安坐家中輕鬆辦年貨。

為直播打響頭炮，苑仔亦有現身平台記者會，並表示有多個國際品牌「撐腰」，笑言自己「有腰骨」：「我夠晒經驗開班教人做直播，好同唔好、被欺騙嘅經驗都唔少，不過我唔收徒弟啦，大家一齊進步就得。」不過苑仔表示直播看似風光，鏡頭背後充滿辛酸：「呢個係真人真事，我試過直播叫人準備定啲尿片，但因為買得太大才冇着到。（忍住去廁所值得？）你要尊重工作，唔可以做做吓走咗去，啲觀眾會覺得好怪。」

苑仔表示「睇中」李霖恩太太加盟直播行列，大讚對方有學識、有才華。霖恩在邊尷尬陪笑：「其實苑仔搵我出嚟都係想介紹佢，都係想捧佢，但我覺得冇所謂，有『軟飯』食都好啊。」

曾控訴《中年好聲音》搶飯碗的魯振順與參賽者劉可同場，魯振順表示未感尷尬：「其實誤會嚟嘅，好似苑仔咁『德高望重』都搶佢唔到，每個人有唔同嘅工作，希望呢個行業都百花齊放。（係咪唔夠食，直播好搵啲？）唔係啊，千祈唔好咁講，依家環境行行都做得好艱難，只係𠵱家流行做直播，都係經營嘅手法嚟嘅。」

回復自由身的魯振順強調離開TVB與任何人無關：「純粹咁啱合約到期，制度改變我哋配合唔到，咪離開一陣囉。呢個世界係圓嘅，冇話絕對嘅。希望在有生之年做到想做、開心的事情。」

劉可預告加盟直播時會唱歌「娛賓」，又笑言想與魯振順組「組合」：「因為我知佢好鍾意唱歌，之前佢做直播可以由朝講到晚，我都擔心佢撐唔住。我哋一齊合唱就唔會唱『情歌』，都係啲勵志歌。」