佘詩曼吳千語同場斗靚！坦承有容貌焦慮

香港文匯報訊（記者 梁靜儀）佘詩曼（阿佘）與吳千語昨日出席美妝品牌活動，席間二人分享保養心得。阿佘透露情人節已有約會，地點選在她的安樂窩中；吳千語與老公去南極旅行後身材發福，她否認為懷孕作準備。

近日頻頻出席活動的阿佘，直言發另類新年財，不過最開心都是媽媽及自己都身體健康，又有工作，並預告本月7日拍完內地廣告後便收爐。今年將留港過年的阿佘，被問到情人節可有人邀約？她笑言已有約會：「約咗幾個人，圈內圈外人都有，日日都過情人節，日日都咁sweet，當日約咗幾個女仔。（有冇男仔？）唔知喎，可能有驚喜，因為唔係我安排。（參加speed dating？）我都冇諗過，喺我屋企。（可介意朋友帶異性出席？）佢哋唔會帶唔識嘅人嚟我屋企，考慮明年出街食。」而阿佘的粉絲、泰國女星鄺玲玲想約她見面，阿佘坦言對方的fans club曾聯絡她，但夾不到時間，不過總會有機會：「我都想了解佢係一個點樣character（個性）嘅人。（可想有機會合作？）都好喎！（進軍泰國市場？）睇吓點樣先，Sawadeeka（泰文問候語）。」

阿佘接受個人容貌轉變

提到有網民將阿佘的舊照比較，大讚她多年來沒變過，她笑謂多謝大家讚賞，但覺得沒可能不變：「盡量keep啦，保持健康作息，都希望保持狀態，但有時都會攰。（有沒有容貌焦慮？）焦慮都冇用啦，呢個係現實，keep唔到都冇辦法，都接受自己嘅轉變，冇可能一出世到現在都係咁嘅樣。覺得唔同年紀有唔同味道，最緊要做自己鍾意嘅事，達到自己夢想，咁樣嘅人生係好精彩。」問到可接受整容時，阿佘坦言不是接受與否的問題，而是自己敢不敢去做。

另外，談到宣萱近日接受訪問時，重提當年離開無綫是因不想「擦鞋」取悅其他人時，阿佘反問：「擦邊個鞋？」阿佘並謂可能她因要忙拍劇，沒時間做其他事：「一年中363日都喺度拍緊戲，都冇咁多時間去干涉其他嘢，我經常都覺得做好自己咪得囉。」

千語稱將來接戲更謹慎

吳千語最近與老公施伯雄及朋友一起到南極旅行十多天，她笑言這次旅行計劃了兩年，更成功解鎖了地球七大洲，完成了心願，她又透露此行更與老公一起跳海，因為海水零度，冷到懷疑人生，落水後只能靠意志游回岸邊。

問她此行與老公可有重拾浪漫溫馨時光？她坦言平日各自出差不是經常見面，去旅行就可以密集式相處，算是一個非常高質量的時光。問其丈夫可有投訴她太忙？她指沒有，幸好大家的工作節奏差不多，比較同步。問她是否因此曾表示跟老公比較疏離？她笑說：「咁緊密又唔係咁好，好多交嗌，適當地疏離幾好，各自各有少少空間。」問她是否因為開心而豐滿了不少？她解釋只是昨天的衣服很緊，感到好像被封印一樣，不過可能旅行期間也吃多了碳水，的確胖了一點，但強調非為生小孩而增磅，生育事順其自然。至於她可有雪卵計劃？她坦言有這個打算：「但未去做，都有人建議過。（老公的家人可有催生B？）又唔係好明顯咁催，暗催囉。」

對於吳千語主演的電影《驅魔龍族馬小玲》日前在網絡上架，未能在戲院上映，問她可會失望？她認為能播映已是很好的結果，因拍這部戲並非一帆風順，要分兩次拍，最初更擔心不能上映。至於網民拿她與萬綺雯比較，她承認當初接拍已預料到：「我都好鍾意佢當年個角色，其實係兩個唔同嘅人及故仔，只係角色同名，當然經典都係好難超越，所以照單全收。（冇被負評影響？）冇，套戲最後上到已經幾開心。我下次收劇本嗰陣小心啲，所有負評我已經習慣。」