Nowhere Boys十周年音樂會 主音Van拗柴跪地 隊友攙扶繼續唱

香港文匯報訊（記者 子棠）樂隊Nowhere Boys前晚舉行《Letters of Nowhere - The Concert》，作為成軍十周年音樂企劃壓軸兼重頭表演，獲張繼聰、黃淑蔓、陳健安、Winka@COLLAR與男友朱芸編、泳兒等圈中人捧場。Nowhere Boys演唱《天外飛仙》時全場勁high，觀眾一齊揈毛巾又一齊跟歌詞跳起，但當主音Van跳起落地時左腳拗柴，失平衡跌倒地上狀甚痛苦，他堅持站起來繼續唱，隊友漁佬立即上前一邊拉小提琴一邊讓出膊頭給Van攙扶，結他手Ken和Bass手Hansun亦上前傍住他繼續表演，Van強忍痛楚叫觀眾「你哋幫我跳」，觀眾跟住一齊唱一齊跳起。

之後Van原地休息鬆鬆腳，咬緊牙關說：「Show must go on!」並堅持站起來繼續演唱，全場振奮吶喊。Van由隊友攙扶走勻三面與觀眾大合照，然後他坐在地上，隊友都陪他坐下演唱，觀眾揮動手機燈和大合唱，一片星海，場面感人。

完騷後，Van立即接受在場救傷隊治療，然後坐輪椅返回舞台與到場嘉賓好友們合照，其間有說有笑。Van憶述受傷一刻：「今日右腳舊患突然好痛，用另一隻腳頂住，可能承重太多，兩隻腳唔同位置係咁抽筋、不停震，我好驚，真係企唔到，一企就仆低，唔知點算。好彩隊友扶住我。」鼓手Nate心痛Van受傷，要原位繼續打鼓的Nate一臉擔心，Ken說：「Nate當時對眼係咁碌，諗緊『點算？點算？』」漁佬笑說：「如果拍低咗Nate眼神，可以幫佢打字幕，應該有幾千字嘅文章！」Van表示看到觀眾揮手燈大合唱時感動得眼濕濕：「我唔想個人情緒影響表演，諗住忍到，打完大佬順利過關，點知隻腳出事，其實唔係好記得之後發生咩事，好似靈魂出竅咁！今日打攪咗好多人，要大家照顧我。」