阿智傑少廣州騷巧執生 草蜢承諾紅館補唱點歌

香港文匯報訊（記者 子棠）組合草蜢為期4年，於全球15個地方舉行的「RE : GRASSHOPPER草蜢巡迴演唱會」日前在廣州體育館舉行終極尾場。開騷前，草蜢三子非常敬重的已故前輩羅文的兩位家姐前來捧場，她們特意到後台為草蜢送上禮物打氣，三子以親筆簽名的「演唱會通行證」作回禮，氹得她們非常開心，高呼：「好鍾意！」

當晚的演出亦發生了小插曲，唱到《紅唇的吻》時，蔡一智（阿智）和蔡一傑（傑少）「調轉咪」。蔡一傑親述當時情況：「我哋兩兄弟支咪竟然調轉咗。我一唱嘅時候發現（耳機）聽唔到自己把聲。」阿智補充說：「我唱嘅時候（耳機）冇咗聲，我估究竟我支咪去咗蔡一傑定蘇志威度，然後發現蔡一傑個眼神好奇怪，於是我就跳咗上佢個台度。」蔡一傑激動笑說：「你唔知係我咩？我已經打晒眼色畀你喎。」兩兄弟以一個華麗轉身，巧妙地交換咪，執生過程流暢自然，在旁的蘇志威表示毫不知情。

演唱會尾聲，由於演唱會歌單需要事前報批，所以未能即興演唱歌迷點唱的歌曲，蔡一智抱歉說：「要同廣州嘅觀眾講聲『寶貝對不起』，你哋想點唱嘅歌，喺社交平台話畀我哋知，4月尾香港紅館演唱會唱畀你哋聽。」為免歌迷失望，決定將演唱會開場逾10分鐘的勁歌熱舞部分，再跳唱一次送給在場歌迷，作為「終極encore」。蔡一智高呼：「重頭再嚟過，真真正正嘅Encore，草蜢嘅文化就係永遠Non-stop，成個Tour呢四年入面未見過呢個場面。」

歷時4年的「RE：GRASSHOPPER草蜢巡迴演唱會」圓滿結束，三子坦言非常不捨；蔡一傑感慨說：「呢幾年發生咗好多事，疫情、我入院做開腦手術，但所有嘢都已過去，我希望個個都身體健康，我祝我所有朋友幸福快樂。」