香港文匯報訊（記者 梁靜儀 ）劇集《非常檢控觀》的「現代陳世美」單元，昨晚（26日）正式落幕，何廣沛飾演的陳新彌（Sammy）名譽掃地兼被退團，及被控拐帶虐待兒童及謀殺粉絲張詩雅（吳嘉儀飾）等罪，眼見謀殺證據確鑿，Sammy再生歪念致電「糟糠妻」秦湘言（陳曉華飾）扮可憐，氹掂湘言探監後，再施展PUA大法，以女兒晶晶（周珈慜飾）做餌逼令湘言代認殺人罪，喪盡天良。終令一直被戀愛沖昏頭腦的湘言清醒，「以退為進」鬧爆Sammy，大快人心。
昨晚這場長達8分鐘的探監戲，廣沛與曉華獲網民大讚默契十足。官方今日發布了《非常》圍讀的花絮，二人的劇本已畫滿記號，相當認真。其實二人今次已第六度合作，亦是繼《回歸》《異搜店》後第三度演CP，在短短四年內堪稱合作無間，廣沛笑言與曉華合作的頻密度，在TVB是數一數二：「我同佢係幾Bro㗎，頭兩三套劇我哋真係唔熟，只係同事，但因為真係對得太多，呢一兩年就Friend喇，大家都好清楚大家咩性格」，並搞笑謂：「其實係公司逼我哋Friend，呢段係用時間堆砌出嚟嘅友誼嚟。」
談到曉華公開表示二人在探監場口要應付12版紙對白，廣沛補充指當日單是對對白及排位，也足足花了至少1.5小時：「平時最盡三版紙，六版紙係多㗎，拍攝過程順利嘅，主要係事前功夫要做足，對白要背到滾瓜爛熟。因為呢場戲長同埋要清晰掌握情緒轉換位置，例如幾時捉住曉華隻手，幾時要摑自己，呢啲都要仔細排練，加上拍攝上想一氣呵成，令情緒連接得好啲，所以我哋係一次過六版紙去排，前後排咗成至少1.5小時。」
談到自摑戲，廣沛笑言至少冚了自己三四十巴：「呢場戲至少三個角度拍攝，每次都至少冚自己五至六巴，估計至少冚咗三四十巴走唔甩。同埋因為冚自己冇得留力，所以冚完都有少少唔記得對白，但值得嘅，冇理由8分鐘戲齋噏，要有啲動作場面。」
至於曉華，受訪時笑言與廣沛是「稱媽道仔」關係：「我雖則成日欺負呢個前輩，但我內心其實好欣賞佢，佢不眠不休、完全冇投訴，好勤力，我諗我地最夾嘅係信任，因為我信任佢，所以我對住佢已經去到直腸直肚嘅地步。」她又指劇中喊戲揮灑自如，全靠賴慰玲一句點醒：「賴慰玲確實係一個好好嘅老師、分析師同埋夥伴，她好輕描淡寫嘅一句說話，就影響咗我拍攝感情戲嘅想法。」
0
已點過讚
0 / 255