草蜢4月紅館騷連嗨6晚 為「嫩粉」炮製專屬歌單

香港文匯報訊（記者 子棠）草蜢為慶祝成軍40周年，將於4月28日至5月3日在紅館舉行一連6場「Grasshopper Three In Love 草蜢演唱會2026」，昨日率先曝光演唱會海報，並宣布2月4日至6日信用卡優先訂票，2月10日公開售票。演唱會除了為追隨逾40年的「元老粉」準備回憶殺，更特別為GenZ「嫩粉」炮製專屬歌單，誓讓全場「all in跳到盡」。

草蜢三子蘇志威（蘇老闆）、蔡一智（阿智）和蔡一傑（傑仔）早前以華麗造型拍攝海報，狀態大勇。蘇老闆說：「今日見我哋着到咁閃咁靚，就知道我哋嚟緊4月嘅演唱會有幾咁靚。」傑仔透露海報拍足7小時，事前更敷咗幾個mask保持fresh狀態。阿智表示海報只是「頭盤」，正式開騷的服飾和舞台布置將靚多十倍。阿智又指今次三人分開拍攝，需憑藉多年默契估對方做咩動作。傑仔笑言：「要靠想像力諗住佢哋會點做。」合作逾40年，草蜢默契依然爆燈。

至於演唱會歌單仍在商討中。傑仔笑言出道40年精選作品眾多，難以取捨。「真係唔知唱邊啲歌好，𠵱家粵語歌大熱，我哋嘅歌完全中晒所有朋友嘅心，可以一齊玩，一定非常開心。」阿智預告將為Gen Z炮製「沉浸式香港的士高」專屬歌單。蘇老闆感慨世事無常，呼籲大家珍惜每次的相聚。阿智亦期待今年觀眾可盡情尖叫大合唱。傑仔表示將公布dress code，邀觀眾一齊打扮靚靚嘅，盡情投入草蜢演唱會世界。