前Super Girls成員陳穎欣澳洲完婚 嫁音樂監製陳考威

香港文匯報訊（記者 子棠）前Super Girls成員陳穎欣（Yanny）與音樂監製陳考威（Gareth）拍拖9年修成正果，昨日在澳洲完婚，並於社交網貼圖分享喜悅，獲前隊友蔡明思（Jessica）和吳嘉禧（Cheronna）以及多位藝人越洋到賀。

新娘子Yanny分享喜悅說：「好開心到外地舉行咗婚禮，見到好多朋友，大家都玩得好開心，最難得就算唔喺香港，仍然見到一班熟悉嘅面孔，有一種好特別感覺，佢哋坐好耐飛機嚟參加我哋嘅婚禮，所以好開心，好感動同好感恩。在場有好多賓客，大家都一齊唱歌、表演，令全場氣氛都好高漲，特別在場嘅每位歌手，都送上佢哋特別嘅歌聲作祝福。雖然我同Gareth都好攰，唔係好夠休息，好多事要去籌備，好彩有個好朋友幫手搞呢個婚禮，令我哋輕鬆好多，可以盡量享受其中。我覺得最驚喜，係Gareth不停喊，因為佢平時係一個好少喊嘅人，但現場無論進場、同父母說話、影相，佢都好感觸咁喊，令到我都覺得好感動。我本身認為結婚可以簡簡單單就好了，好多謝Gareth提出一定要搞呢個婚禮，畀我嘅體驗原來係咁開心、咁有幸福感，令到大家都覺得好難忘。」