獲肥媽親授冧仔「姣功」 龔嘉欣認難招架 感情隨緣

香港文匯報訊（記者 梁靜儀）龔嘉欣、肥媽（Maria Cordero）及李家鼎（鼎爺）昨日出席無綫節目《在家宴客60道菜》記者會，現場率先播放節目精彩片段，嘉欣被肥媽笑指她感情仍未有着落，全因不夠姣，獲肥媽親授冧仔秘技，嘉欣自認難招架，感情隨緣。

記者會上嘉欣、肥媽及鼎爺與香港名廚邵德龍、李文星、黃永幟、 許美德、Jacques Kagi一同分享拍攝感受，嘉欣更即場示範劏肉蟹，並由肥媽、鼎爺教授劏蟹技巧及貼士。

婉拒拍《女神配對計劃2》

嘉欣表示因上次節目口碑好，所以再添食，但因為要夾大家的檔期，所以隔咗好耐才再開拍節目，但都好開心，今次拍攝節目，大家除了講廚藝外，最關心的是她的感情狀況，肥媽更教嘉欣怎樣去姣男人：「今次因為大家熟絡咗，所以話題都比較大膽直接。（肥媽嫌你唔夠姣？）你唔好聽佢講喇，以前我性格比較直，有嗰句講嗰句，但其實都需要學識溫柔，我都有呢一面只係大家唔發覺，肥媽口中講姣嘅尺度，自己真係搞唔掂，佢叫我眼甘甘望着對方，人哋可能唔知咩事，真係一巴摑埋嚟。」她又稱今次難得跟多位名廚學烹飪，「以前都怕煮得太難食，但現在都敢招呼人來我家中食飯。」

問到會否自薦參加戀綜《女神配對計劃2》？嘉欣自爆早已有人邀她拍節目：「公司其實都有問過我，但我又無諗過，已經拒絕咗，自己𠵱家心態比較隨緣，之前好多朋友都會介紹男性朋友畀我認識，大家都好緊張，但𠵱家唔去諗，反而整個人會開心咗，所以隨緣比較好。」

奪得視后之後久未拍新劇的嘉欣表示，4月即將拍新劇，她笑說：「好開心又可以拍劇又可以做主持，之後又接咗兩個登台，保持住去年嘅豐收，今年唔使擔心，保持到人氣及財氣。」