新劇搏命演古惑仔 黎諾懿韌帶九成撕裂

香港文匯報訊（記者 子棠）黎諾懿和李佳芯（Ali）主演馬來西亞的黑幫權謀劇《義和》（The Exiled），開播以來話題十足、並且口碑甚佳，二人飾演的黑幫人物亦甚有江湖味，一洗7年前《BB來了》的新手爸媽形象。新劇不乏追車、講數、槍戰、打鬥等刺激場口，不過吸睛鏡頭的背後，兩位主角都付出了「代價」，其中連場打戲的黎諾懿，觸及舊患，膊頭韌帶九成撕裂，而Ali則指今次角色大部分都是沉重場口，絕對是有血有淚。

黎諾懿因為拍攝連場打戲，膊頭嚴重受傷：「今次有好多古惑仔打鬥戲，有好多拳腳、動刀，最驚係用到真嘅鐵刀、鐵鏟，要拍啲斬人戲份，真係要好小心，記得其中一個演員打完之後，佢成手都係血，因為佢俾個鐵鏟整親。而我本身右邊膊頭有舊患，而為了應付大量打戲，搞到韌帶撕裂咗九成，𠵱家仲醫緊，未完全康復，今次真係瞓身演出。」問到演古惑仔，可有向老友鄭伊健取經？黎諾懿自言角色表面斯文、內裏兇狠，是一位渴望洗白的古惑仔，沒有任何角色可參考。

至於飾演社團大嫂的Ali，為了投入角色，數月來沉浸在陰沉的情緒當中差點崩潰：「冰姐係一個有好多經歷嘅人，老公過身、擔起社團責任，又要打、撞車，仲要有聲嘶力竭咁喊嘅戲份，大部分都係沉重場口，對演員嚟講係好慘，開機拍攝前嘅準備，連埋拍攝，幾個月都要沉溺呢種情緒。好彩暫時呢幾年，我都係一年一劇，有足夠嘅體力同精神去應付，雖然係沉重，但演繹上係過足戲癮，因為正常人生好難會做到呢啲嘢。」由於角色人設與現實的Ali有極大反差，Ali指：「最大反差係『氣場』，外人可能覺得我好硬淨，但我覺得自己唔係好有氣場，我個底線係順其自然，所以同角色一出場就要好壓場，喝一聲啲人就靜晒個氣場，好大反差。」