香港文匯報訊（記者 梁靜儀）本周日晚（28日）播出的娛樂訪談節目《一周星星》，嘉賓是還未正式上映已熱爆全港的電影《尋秦記》四位主演古天樂（古仔）、宣萱、林峯及朱鑑然，主持則是區永權。
區永權求證古仔「唔畀人趷（戲弄）」傳聞，現場即變聯歡會。古仔急忙「澄清」：「你講咩呀？（馬上指着宣萱）佢嗰日唔趷過我唔開心。」區永權聞言追問宣萱：「傳聞呢個世上，得你一個可以對着鏡頭趷佢（古仔）。」古仔搶答：「佢唔對着鏡頭都係趷㗎喇。」宣萱則強烈抗議二人唱雙簧，古仔卻笑稱：「我好記仇嘅，你死緊喇今次！」林峯更「補刀」：「我諗緊邊日你冇趷佢嘅，又好似冇……」被圍攻的宣萱，即強調「開工我冇趷佢嘅。」
區永權見二人互窒不斷，只好打圓場：「會唔會趷到自己都唔覺？」宣萱笑回：「咁我真係唔知呀！」古仔加多兩錢肉緊謂：「咪係咯！（點解你俾佢趷？）咁我都唔知吖嘛，我都慣咗喇嘛，你估我想㗎？」節目中宣萱更親授成功「趷古仔」秘訣，笑料滿滿。
當她提到與郭羨妮重逢「仲啱傾過以前」時，古仔搭話：「即係以前唔啱傾」，遭宣萱白眼反擊，罵他「攪屎棍」。之後宣萱談到與歐瑞偉（角色陶總管）拍感情戲很快投入，古仔又再口多多：「即係你同陶總管有感情線，你意思係。」氣得宣萱狂打古仔，古仔只能無奈回應：「成日郁手郁腳。」之後宣萱應區永權要求向古仔表達謝意，熱情的她即作勢送上「熊抱」，古仔見狀即閘住：「唔好郁手郁腳呀喂！」「唔好摸呀！」最後連環慘食檸檬的宣萱竟出拳狂打古仔，十分搞笑。
談到劇集《尋秦記》經典NG片段廣傳至今，而其中一條古仔因大力篤宣萱心口，令宣萱爆笑不止的NG片時，宣萱稱至今仍感「委屈」：「我睇親都笑，我估我睇三十，甚至一百次都會笑。佢冇當我女人咯，可能對佢嚟講力度係四，但對我嚟講已經係七八㗎喇。」古仔辯解：「篤本身唔大力唔係叫做篤嘅，叫做撩。」並應區永權要求即場示範向宣萱「撩穴」，宣萱見狀即靈活閃避：「唔好撩我。」
古仔除會大爆宣萱唔記得對白瘀事，還笑言宣萱「一分鐘都不能停嘴」。面對古仔連環強攻，宣萱一度扁嘴抗議，古仔竟模仿她表情「反擊」。
0
已點過讚
0 / 255