農夫開工作室搞棟篤笑賽 范梓謙首辦音樂會打大佬

香港文匯報訊（記者 子棠）每年麥花臣場館於一月至四月期間舉辦年度音樂盛事「麥花臣節」，提供豁免租場名額及青年培訓計劃，而今年的「麥花臣節2026」更邀得不同的歌手單位合作，由農夫與范梓謙（Teddy Fan）打頭陣，更預告即將陸續公布更多強勢陣容加入。

近開設工作室「農作天下」（So Fa So Cool）的農夫宣布頭炮製作，於「麥花臣節2026」舉行粵語棟篤笑大賽《港笑》，更是兩人首次以主辦單位身份做Show。陸永直言是個「唔太生嘅生意」：「因為我哋想試吓自己嘅製作能力，可以做到個主辦，好彩又有麥花臣同我哋合作，解決咗好多場地嘅問題。」C君笑謂幸好平日夠八卦：「我鍾意去留意唔同嘅嘢，又會參與創作，所以今次做主辦要處理嘅嘢，都近乎想像之中，不過當中好多細節比想像中複雜，handle到嘅。」他更力推所有表演者都要試做一次主辦：「你知道點去計budget（預算）、計人手，更加有利之後嘅創作，真係整個視野唔同晒。」陸永解釋為何這個活動不是「生意」，亦趁機宣傳：「因為想多啲人睇，所以我哋個票價真係非常合理。」C君接着說：「人哋最平嘅票價，係我哋最貴嘅票價，仲要睇兩場，初賽同決賽。麥花臣又好坐又夠冷氣。」

農夫向來鍾情棟篤笑，陸永說：「我唔知道我哋能力有幾多，想盡量多啲人認識就好啦。棟篤笑喺香港唔係一個好流行嘅表演方式，可能聽落好容易，一個人上台講十幾分鐘咋喎，但其實係一樣千錘百煉出嚟嘅嘢，勇氣好緊要。」C君認同肯上台表演棟篤笑已經好有膽識：「大家要畀自己多啲自豪，尤其喺整個世界都處於較多不快樂嘅時間，去做棟篤笑，起碼令人笑吓、放鬆一下，係一件好偉大嘅事。」

現時已收到過百份參賽報名表，完全超出他們想像。陸永私心分享他的小貼士：「可能嚟參賽嘅，唔係做開棟篤笑嘅名人，最好要介紹到自己先，因為我要知道你係邊個，才可以投入到你嘅世界。唔使好複雜，好似『我係一個廚師』咁之後就可以講關於廚房嘅，或者飲食界嘅笑話㗎啦。」農夫曾經在場館做過多次演出，最難忘的是場館自由度很高：「有次我哋喺個台度邊化妝、整頭，啲觀眾邊入場，我哋就同佢哋傾偈，之後完騷就送客，企喺門口逐個握手，估唔到我哋都握咗整個鐘，辛苦場館啲同事。」

至於Teddy Fan亦會在場館舉辦首個音樂會，他興奮表示：「個騷會叫BOSS GAME，即係打大佬關。我一直想有自己嘅Show，呢兩年過五關斬六將終於有，對我嚟講就是打大佬嘅時刻。所有觀眾就係我大佬，我要畀一個好嘅演出大家睇。我係Band出身，今次主要玩Band，希望大家一起跳到好攰。」