梁詠琪（Gigi）與陳湛文主演的勵志電影《逆轉上半場》於聖誕節期間上映，二人近日為電影接受訪問。Gigi表示因老公的妹妹最近誕下B女，所以聖誕節期間會陪老公返西班牙，宣傳工作就要靠陳湛文，不過之前影片上映優先場口碑很好， 所以起程前她都做了幾場謝票。Gigi稱老公和女兒零障礙睇戲，都大讚好睇，笑言自己是「潮媽」， 學跳女團舞冧囡囡。
影片以足球比喻人生，講述幾位主角如何從谷底反彈，克服逆境追逐夢想的故事，適合一家大細入場睇。Gigi表示之前邀請了曾合作劇集《反起跑聯盟》的一班小演員觀影，女兒Sofia亦已率先捧場，睇完更大讚：「阿女話『呢套戲係媽咪最好睇嘅一部戲』。」陳湛文就問 Gigi：「佢係咪睇晒你所有的作品？」Gigi坦白說：「就係冇。」 Gigi又指平日都會跟女兒講粵語，所以她睇得明，連唔識中文，要睇字幕的老公都大讚好睇。
陳湛文呷醋女兒迷上Locker
陳湛文搞笑指電影可以衝出香港，又指太太與4歲女兒睇完後都讚好睇，他更大爆拍攝期間女兒曾探班，但就沒有問他為何要坐輪椅，只是不停追問「有冇Locker（林家熙）？」 他呷醋說：「因為阿女好鍾意睇YouTube《試當真》，迷上咗呢個男人。」Gigi指Locker瘦瘦哋，樣子也有點似他？陳湛文即很大反應說：「唔係嘛？佢靚仔咁多。」
身為父母的二人，今次與眾多小朋友合作，是否覺得好容易呢？陳湛文說：「我從未試過同一大班小朋友合作，但係我好enjoy嘅，因為我本身就係一個大細路。」家中有兩個姨甥及兩個侄仔的他，自認跟小朋友相處有一手：「都係問吓佢哋拍拖未啊？有冇女朋友？呢啲係打開話題最好嘅方式，又會互窒，中間夾雜一啲屎尿屁，話題要追得上潮流，例如最近興講six seven（無意義的幽默）。」
做開明父母放手讓子女嘗試
Gigi指女兒也說校內有人講，但其實冇意思。兩人都認為做父母要追上潮流，Gigi笑指經常被女兒「更新」資訊：「因為個女鍾意唱韓文K-pop，會告訴我𠵱家韓國有啲咩韓團。佢鍾意記錄韓國女團啲名，寫晒出嚟，乘數表都冇咁叻。佢真係見到嗰個人就知佢係邊一個團、邊一個星座、咩國籍都記得一清二楚。我覺得好明顯佢嘅興趣就係唱歌，加上鍾意跳舞，有學跳K-pop，咁我都要跟上潮流，咪學幾招玩下咁囉，滿足下個女。」
她又可會鼓勵女兒去追夢？Gigi認為做父母最重要的是給機會讓子女去嘗試：「佢想試吓乜嘢都畀佢試，唔好一嚟就打沉佢，要放手畀子女去嘗試，呢方面我都幾開放，讓佢自由選擇。至於話追夢？其實佢鍾意唱歌跳舞意向好明顯，我都會同佢解釋，將來能否將唱歌跳舞發展為職業，其實好睇緣分同個時代，所以我覺得唔需要想太多，只要享受現在想做嘅事。」
陳湛文亦很認同Gigi的看法，不過現在女兒尚小，未需要急切去想這個問題， 反而當務之急是為女兒報小學：「我要拋棄以前住邊度就喺邊度返學嘅呢一個概念，以前簡單啲，係你住嗰區就讀嗰區，𠵱家要跨區， 又要報面試班。」Gigi 就以過來人身份分享自己的經驗，提議最重要的是多跟女兒傾偈及陪伴， 就已經是最好的面試班。
●採、攝：香港文匯報記者 梁靜儀
●梁詠琪 化妝：Circle Cheung （ndnco.co） 髮型：Sam Lo @Orient4 & Victoria Wong @Orient4
●陳湛文 服裝：CLUB MONACO 妝髮： Rachel Mok @ Lisa C. Makeup Art 場地： Lubuds Group, FWD House 1881
0
已點過讚
0 / 255