三度參與大坑舞火龍 洪助昇躍升「龍頭大哥」

香港文匯報訊（記者 子棠）洪助昇（Aiden）日前第三度參與大坑舞火龍，今年更成功「升呢」，由以往舞龍身一躍成為「龍頭大哥」！去年已開到口渴望做「龍頭大哥」的Aiden願望成真，他笑到四萬咁口說：「十分開心，但龍頭比起想像中重好多。成個龍頭插埋香都有120磅重，所以要舉得起都好唔容易，舉起之後亦好難搵到個平衡。」不單止舞龍頭的難度跟他想像中的完全是兩回事，而且更要點着火於街上遊走舞動，真的少點力氣都不行。Aiden指最重要找到平衡，而且交接過程要順暢，一不留神就會受傷，所以全程要打醒十二分精神。

為了迎接這個重任，Aiden有備而戰：「最近有加強重量訓練和行山，等身體習慣到高強度運動嘅節奏，否則怕自己玩一陣就喘氣，哈哈。」他更自爆難忘蝦碌事：「第一次攞起個龍頭嘅時候有啲失平衡，好彩師兄即刻衝過嚟。之後我嚇到唔係好夠膽再試。」幸好有一班師兄睇住，不停教路兼分享秘訣，令他夠膽再上前挑戰，最後成功完成任務。Aiden謂特別多謝師兄們幫手，又大讚今年觀眾十分熱情，大家都度過了一個好快樂的中秋。經過今次成功征服龍頭，他希望再挑戰其他位置。