家燕姐郭鋒澳門合體　再續《十月初五的月光》前緣

香港文匯報訊（記者 子棠）薛家燕、龔慈恩、林愷鈴（Ashley）與澳門特別行政區政府旅遊局合作的四集式短劇，今日播映結局篇，故事講述「嫲嫲」家燕姐到澳門尋找初戀男友，引發連番趣事；而結局篇請來了在經典劇《十月初五的月光》飾演「Q姨」家燕姐舊情人的「祝展輝」郭鋒，客串擔演「嫲嫲」初戀男友，二人相隔多年重返澳門合作拍劇，再次《十月初五的月光》「Re-U」，掀起觀眾集體回憶。

家燕姐與郭鋒相隔多年重返澳門合體，家燕姐表示：「2000年合作拍劇《十月初五的月光》，之後2015年我哋有合作《十月初五的月光》電影版，所以上一次合作，係2015年。」相隔十年再度合作，家燕姐指郭鋒依舊熱情、感覺親切，有一份濃濃的情義結。而郭鋒則笑言自己跟往年大有不同：「舊時好多頭髮，後生冇咁肥，而家肥咗。今是晬被家燕姐打動而客串角色。」身旁家燕姐即補充：「故事講我要喺澳門搵初戀情人，播咗幾集，好多人問邊個飾演我初戀情人，我諗喺澳門度拍，《十月初五的月光》有個做我情人，不如請番佢嚟，呢套劇好多人睇過，好大回憶，於是我就嘗試打畀郭鋒，請佢客串做我初戀情人，佢好賞面，令到大家都好開心，對整套劇嚟講，係大家都好期待見嘅嘢。」

二人難得再次在澳門拍劇，家燕姐透露大受歡迎：「好欣賞澳門朋友嘅熱情，唔知點解拍攝時候，個個街坊都當我哋好似親戚咁，好熱情咁打招呼。鋒哥（郭鋒）仲話想請我去龍記食乳鴿同魚翅，原來龍記都冇咗好耐，而家澳門變得好繁榮同國際化，但亦有保留古代歷史文物。」郭鋒就指澳門是他人生首次出埠的地方：「細個時候，剛讀完書，啱啱攞到身份證，第一個出埠到嘅地方就係澳門，當年同朋友一齊坐船，當年去澳門坐船，要坐3個半鐘。」