香港文匯報訊（記者 阿祖） 一連兩場的關智斌「The Endless Adventure Live in Hong Kong」演唱會昨晚（26日）於啟德體藝館正式開鑼。英皇主席楊受成博士與太太陸小曼、霍汶希（Mani）、容祖兒、蔡卓妍（阿Sa）、鍾欣潼（阿嬌）、泳兒、周家怡、鄧小巧、吳千語與老公施伯雄、蔡一智等到來支持。
Kenny以紅色閃石西裝，搭配連串勁歌熱舞開場，瞬間點燃全場氣氛。跳唱一輪後，Kenny已經汗流浹背，搞笑地說：「我除咗件衫先，因為呢件褸都真係幾重，呢套衫係香港一個好著名做演唱會嘅服裝之父，Kenneth（陳華國）幫我做，佢幫過好多殿堂級歌手做演唱會嘅服裝，我今日呢套就係佢嘅手筆啦！咁係咪都代表我係殿堂級呀？哈哈。」除衫後，台下有女觀眾已迫不及待大叫「剝衫」，Kenny即安撫：「慢慢嚟啦前面呢個姐姐，有你想睇嘅嘢嘅。」萬眾期待的「爆肌環節」，唱到《Ready To Go》時，Kenny大晒苦練成果，於街頭健身架上做出各種高難度動作，麒麟臂力同腹肌零死角全面展示，令全場粉絲血脈沸騰。
Kenny感性地表示，出道23年，由偶像歌手變成……依然是偶像歌手：「唔易㗎，要keep住！」Kenny今次終於迎來首個真正屬於自己的演唱會，笑言：「我都知我嘅偶像包袱比較重，所以今晚我就諗住一層一層咁樣撕開佢、一層一層咁開佢畀你哋睇。」他特別感謝容祖兒、阿Sa同阿嬌的支持，祖兒在他自我懷疑時給予鼓勵，一句「做自己嘅演唱會，係冇得妥協㗎，你一定要做到你自己想做嘅嘢。」點醒了他。說到動情處，Kenny一度哽咽，台下的祖兒早已哭成淚人，場面感人。
與鄭希怡極盡誘惑
久未現身香港舞台的鄭希怡擔任表演嘉賓，與Kenny合唱《相對濕度》《閒人勿近》，鄭希怡拖着戴着皮鐵頸鏈的Kenny在台上爬行，極盡誘惑，視覺衝擊力十足，看得觀眾血壓飆升。
而相識二十年的薛凱琪（Fiona）亦專程由北京返香港做嘉賓！二人合唱《南昌街王子》《奇洛李維斯回信》，回憶即刻返晒嚟。二人對話更是笑料不斷，當Kenny知道Fiona做完嘉賓當晚即飛走後，Fiona突然搞gag，「我願意為你周圍奔波呀，因為你係關智『奔』呀，奔波呀，哈哈。」這個gag連Kenny都頂不住。Fiona又自爆話有次跟Kenny食飯傾事業，傾到差點以為Kenny想追求自己，，誰知Kenny竟完全忘記此事，激到Fiona大叫：「得一次咋喎！同你食飯！」老友互動笑料百出。
祖兒攬關智斌爆喊
除此之外，雖然Kenny早前曾經拒絕讓自薦做嘉賓的阿Sa上台，不過演唱會上Kenny坦言：「我嘅演唱會，冇佢三個上嚟，都真係講唔通啦，係咪呀。」有「龍虎豹」之稱的祖兒、阿Sa及阿嬌隨即升上舞台，四人合唱《死性不改》，唱到尾聲時祖兒更攬住Kenny喊到收唔到聲：「我好戥你開心呀！」
唱完歌之後，三女露出本性，開始對Kenny上下其手，又摸pat pat又摸胸，仲大嗌「好彈手」！阿Sa更理直氣壯地說：「頭先我哋喺後台研究咗好耐，聽講你收埋嗰啲嘢，我哋就係諗住嚟搵吓。」Kenny雖然不斷反抗，表示：「件衫唔係咁設計㗎，stylist會嬲。」但三女異口同聲話：「唔會㗎，你靚仔做乜都得㗎！」最後Kenny唯有就範，直接將西裝褸脫下一半，引得三人瘋狂大叫。
整個演唱會於一片歡笑及感動之中進入尾聲，雖然唱完《死性不改》，但阿Sa意猶未盡，正當Kenny準備送三人落台時，祖兒突然問：「就咁走得㗎啦？」阿Sa即接話：「哎呀！我想同你唱之後嗰隻歌呀。」Kenny即說：「咁今晚最後一首歌你哋陪埋我㗎啦喺度。」阿Sa開心到又叫又跳：「好呀！好嘢！好開心呀！」祖兒即「食住上」跟阿Sa說：「哎呀！關智斌好話得事呀！」阿嬌仲加多句：「好Man呀。」搞到全場大笑！最後合唱埋《眼紅館》才肯散場。
0 / 255