《頭文字D》再掀熱潮 劉偉強爆周杰倫飄移撞山

香港文匯報訊（記者 阿祖）劉偉強與麥兆輝經典作品《頭文字D》上映20周年，今年以4K修復及杜比全景聲重返大銀幕，再掀熱潮，連續一星期港產片票房冠軍，票房直迫200萬港元。本周日（28號）麥兆輝導演將現身圓方戲院放映的「金句場」，全場嗌爆「三萬蚊過夜」的威力，映後更有分享會，親自拆解金句背後小秘密。

至於劉偉強導演早前現身AE86香港車友聚會，表示非常興奮又震撼。劉導說：「我真係好驚喜見到廿幾架AE86，好開心，佢哋真係好熱心，借出佢哋嘅愛車出嚟，嗰啲引擎真係整到好勁。我好後悔當年拍完戲，我冇帶晒所有AE86返香港，搞到現在都好想買返架！」

劉導更爆料周杰倫拍《頭文字D》期間發生意外，AE86車頭撞毁，他說：「當日有一個鏡頭唔需要周杰倫飄移，唔知點解佢突然去飄，結果一甩就撞咗埋山。我哋即刻衝去現場，見到佢企喺架車旁邊。我問佢有冇事？佢話『沒事、沒事』，但係佢面都青埋，嘴唇都白晒！我問佢知唔知架車幾多錢？佢話佢賠，我話唔係賠錢嘅問題，係搵唔到，因為我哋搵到架車返嚟仲要改裝。當然最緊要好好彩佢人冇事！」

周杰倫最難忘電影全以真車拍攝，他說：「我記得拍攝《頭文字D》的時候，拍攝隊為追求真實感，使用真車拍攝，真實的飄移。20年後《頭文字D》經過4K數碼修復重現大銀幕，希望大家透過全新試聽效果，一齊經歷我們的飄移青春！」

劉導遇上AE86好興奮，而戲中飾演「須藤京一」的陳小春，找來當年他在戲中同款的戰車拍攝宣傳片。他憶述當年前拍攝《頭文字D》難忘事，更大講戲中金句對白和招牌手勢，令人回味。小春說：「眨吓眼20年，我記得當時拍呢套戲嘅時候，突然遇上大風雨定係颱風，停咗幾日工，日日都食蕎麥麵，但拍得好開心，希望大家入戲院支持《頭文字D》4K修復版，Twice！」

戲中飾演「高橋涼介」的陳冠希亦表示興奮，還扮賽車引擎聲和扭肽盤的手勢，揚言挑戰觀眾入場睇10次。而飾演「拓海」老闆、加油站話事人「立花佑一」的鍾鎮濤，戲中亦不少金句出自他的角色，他說：「記唔記得其中一場，我話『買架Benz俾你，再加隻撈吖！』？哈哈，大家快啲入戲院，再次感受賽車場面嘅震撼！」飾演「中里毅」的余文樂表示期待入場欣賞《頭文字D》4K修復及杜比全景聲。