【滎心一言】「精算暴雪」馬膽材

丘嘉滎

今季煞科戰安排喺快活谷馬場舉行，不過啱啱沙田都舉行咗煞科儀式，加上谷草賽事水準較為平淡，感覺就好似完咗馬季咁，好在今期有場二班千二，吸引到唔少喺沙田有表現嘅馬匹報名，叫做有番啲睇頭，就好似「魔術控制」、「精算暴雪」同「美麗第一」都希望轉場恰對手。

其中「精算暴雪」喺同程上名率幾高，7次出賽取得2冠1亞2季，雖然上仗形勢啱晒佢跑，奈何遇到排1檔兼回勇嘅「氣勢」，但睇番沙田當日掛好地牌，「精算暴雪」造出1分08秒24表現亮眼，今場有「魔術控制」初戴面箍預計會上前，「同祥和順」同久休嘅「電氣騎士」都唔慢，預計步速偏快，再加上「精算暴雪」賽前仲磨多兩課大閘，操練咁積極倉主梗係想贏到最後一日啦！