【滎心一言】紅海風帆再下一城

丘嘉滎

文家良暫時平咗自己單季頭馬數字紀錄，難得今季成績咁好，梗係想繼續贏馬破紀錄啦！

馬房今期較有看頭嘅馬匹，應該要數到「綫路神驊」同「紅海風帆」，前駒搵潘頓理所當然成為熱門，不過以跑法嚟講好似「紅海風帆」着數啲，今期四班千二拆兩組，第二組快馬唔多，前速較快嘅「同喜」喺「紅海風帆」外面，除非「同喜」早段快成個馬位，否則小妮子應該可以單騎領放，而且「紅海風帆」雖然跑咗三季，但係現在才四歲幾，馬匹季中曾因喉部手術而休息咗一輪，去到五月先復出體力充沛，難怪文家良贏完五班賽之後仲搵黃寶妮彈多一課草閘，今期繼續配見習生負109磅輕飄飄，騎練合作成績咁好搏「紅海風帆」再次一放到底！