曾展望（GM）參加戀愛真人騷《女神配對計劃》力追「女神」葉蒨文（Sophie）令他一夜成名。二人早前已在《愛·回家之開心速遞》中結緣，因此這對《愛回家》CP獲不少觀眾支持，但同時有人質疑是劇組的編排，GM接受香港文匯報專訪，發誓絕無造假，更大談感情和事業展望。

憑演處境劇《愛·回家之開心速遞》成功入屋的GM，近日曝光率爆燈，除了主持直播節目《奇情谷》外，同時亦有份參與熱播戀愛綜藝節目《女神配對計劃》，首集現身的GM，因大膽向Sophie示愛，迅即成網上熱話，而GM狂冧Sophie的精華片段，更在短短11小時內狂吸逾80萬點擊，就連當事人GM亦大呼：「受寵若驚。」
在經理人陪同下接受訪問的GM，準時到達拍攝地點，拿着大旅行袋的他，甫坐下即拿出化妝品補妝，未有假手於人，十分專業。對於近日憑戀綜節目大受歡迎，他謙稱是大家畀面及支持，自己亦沒想過節目播出後有如此大回響，多謝大家如此關注他：「見到好多評論支持我，有啲搵返我之前啲作品出嚟，重新睇多次，再send返畀我睇，都覺得幾有成就感。」

早預「食檸檬」？

備受TVB力捧上位的GM，拍拖又可否公開戀情？GM相信公司會開綠燈：「公司開呢個節目（《女神配對計劃》）就係開綠燈嗎？我參加時公司都知，公司又唔係大家諗到咁限制藝人拍拖，主要係唔想大家影響工作，都係為前途着想，有時感情關係好易令人情緒波動。如果可以處理好感情同時做好工作，公司係唔會阻止，（公司開咗綠燈畀你？）其實冇咁溝通過，只係畀我參加節目，係我自己報名參加。」
說到不少觀眾質疑他在《女神配對計劃》中是跟劇本演出，GM發誓絕對沒有劇本：「真係冇，如果係對白，我就係一個好好嘅編劇，（為何唔私下追Sophie？）如果我私下追，我要喺節目度睇住佢被其他人追，我又唔係好Happy，所以我就上去（節目）。」因一時衝動參加節目的GM，雖然未知能否將女神追到手，但他已做定「食檸檬」的心理準備。談到心目中的女神條件，GM表示喜歡開朗、幽默的女生，外形則沒有特定要求。至於是否要對方欣賞他的「爛Gag」，他笑言任何人都喜歡其他人欣賞自己，這都是溝通方法的一種，他會歸納為「夾」的一種。

大方公開戀愛史

談到感情生活，GM透露曾拍過4次拖，入行後曾拍過一次拖，對方是圈外人，不過最後雙方因性格不合而分開。在節目上憑着真情剖白冧掂Sophie的GM，他笑說：「我好少特登去追一個女仔，（被女仔追？）又唔好咁講，係自然情投意合，我都係慢熱嘅人，通常係一大班朋友開始，傾落慢慢了解再開始。」談到追女「必殺技」，GM認為是真誠，喜歡大家坦誠相對，很怕左瞞右瞞。

捨會計專業追演藝夢

GM曾就讀香港理工大學會計系，擅長拉丁舞、結他，求學時期又是戲劇學會成員，喜歡唱歌。雖然GM從小對演藝感興趣，但原來未打算入行，其入行經過純屬機緣巧合。GM憶述有一天上學遇到J2台《#後生仔傾吓偈》街頭訪問，之後過了約半年，他就收到節目組聯繫邀請他加入《#後生仔2.0》，雖然機會難得，但他當時仍在美國會計實習，最終考慮了一晚才答應。GM一心抱着認識朋友及兼職賺錢的心態入行，更自爆第一日返電視台開工，幾乎被「彈鐘」：「第一日入到錄影廠，工作人員問我『你係邊個？』，好似唔識我咁，因為我喺美國做咗3個月實習，肥咗20磅，嗰時係我人生一個重量高峰，當時我係重77kg（約169磅），我諗緊佢哋係咪想彈鐘呢？」

2018年，GM加入《#後生仔傾吓偈》，又曾主持兒童節目《Think Big天地》。GM在2021年畢業決定放棄做會計師，簽TVB經理人合約，演出機會亦陸續而來，不單加入《愛·回家之開心速遞》飾演接龍員工Mike，又曾參演《青春不要臉》《金宵大廈2》《法證先鋒V》等劇集。

說到不少藝人收入微薄，要靠兼職維生，GM坦言都有試過。信奉道教的他，亦是一名七品道士，GM表示沒有想過以此為謀生技能，主要是幫人為主，試過幫藝人消除病痛。他坦言當然都有幫自己的星運祈求，希望有更多機會，但絕不會妄想可以不勞而獲。

冀出代表作令母自豪

GM不諱言其母當然希望他能從事收入穩定的工作，所以他曾答應媽媽，如果28歲做不出成績，就會轉換跑道去做廣告。還以為他會選做會計師工作，性格開朗的GM自言喜歡接觸人，而讀會計學到的邏輯其實沒有浪費，數口精的他都希望將來有自己的公司。GM不諱言都曾對其演戲路灰心：「都有問自己係咪唔適合呢行，自己嘅演出係咪唔啱觀眾合味呢？」幸好他在限時前3個月前做出了小成績，連原本不太贊成他入行的媽咪都改口，他笑說：「因為自己都想繼續做呢行，一直都有諗過點說服媽咪，好彩今次得到大家支持，媽咪都同我講『阿仔，我支持你』。」GM因為爸爸早逝，作為家中長子的他，亦希望自己能力上可以再肩負多些家庭負擔。對於演藝事業，GM希望再下苦功，將來有一部代表作，到時可以在宣傳海報上簽名送給媽咪，好讓她自豪。

採訪：梁靜儀
攝影：郭木又
場地：千禧新世界酒店
服裝：Calvin Klein