【地表最強】「勝萬金」勝在輕飄飄

兆　文

第五場第三班1000米。「勝萬金」季內已出賽13次，取得3冠3亞3季2殿佳績，除了初出一仗跑第八，每一仗都取得獎金，而且不論田草還是谷草，由五班開始升彈至三班，一直保持穩定演出。

大前仗首度上三班作賽，出戰同程跑第三，當晚就係「三代同心」全晚走三疊望空都贏的一晚，內欄前置馬甚為不利，而「勝萬金」在快步速下搶頭，早段比「年少多好」更快，形勢不利居然亦頂到一席季軍。前仗同程放得過急，上仗就爭非擅長的田草，兩仗都跑第四；今仗孭磅比起強敵「年少多好」、「四季醒」輕得多，有望走二疊或守好位形勢有利，再贏一場唔出奇。

第九場第三班1200米。「騰龍四海」今季首兩戰爭1400都上名，之後一度扳上1600效果一般，跟手跑番1400兩戰又輸，於是改向短途一試，果然338場在田草1200打開勝門，就算打後兩戰未能再贏，該兩仗排外檔亦入位。

文家良近年成績優異，主要原因肯改肯變，正如「騰龍四海」原本跑中距離，變陣改攻短途取得突破，到跑田草滑了啞，去到三月份又再變，呢次安排改攻谷草，效果如何有目共睹，對上四戰贏了三次。睇番上仗首度於三班建功，締速快至1.09.14，亦是今季同程第六快時間，足見不斷進步，睇埋潘頓揀騎，推庄上仗大勝的「風雲武士」，人強馬壯放心追捧。