(有片) 雲浩影首個個唱8月登場 挑戰笨豬跳練膽量

香港文匯報訊 (記者 梁靜儀) 「仙氣女神」雲浩影(Cloud)將於8月2日假旺角麥花臣舉行首個個人演唱會《Finding Cloud 雲浩影演唱會2025》，門票將於6月25日早上十時起優先預訂門票，其中購買1,500元VIP門票的「迷雲黨」（Cloud歌迷暱稱）更會獲得專屬福利，包括Cloud會親手寫上你名字的「To簽小卡」以及「1對1合照」留念。

Cloud興奮表示得知舉行首個個人演唱會消息後第一個反應是「終於要嚟啦！」因為是她和「迷雲黨」期待已久的一場派對。她透露第一個通知的是蘇道哲，因為要預約對方成為今次演唱會的音樂總監。

演唱會海報由合作無間的Miss Bean操刀，背景以天空藍色為主調，Cloud穿上白色背心裙躲於流蘇布景之間，再輕輕探頭猶如邀請大家踏上尋找「雲」的旅程。她說：「同大家一齊去揭開、尋找真正嘅雲浩影。演唱會以Chapter形式進行，記錄咗我呢段時間學到同經歷過嘅嘢，希望透過歌曲同大家分享。」

演唱會的歌單編排上，Cloud坦言困難之處在於自己未有太多個人作品。她說：「要排一個完整嘅Rundown要考慮好多，當中亦有Cover歌，最困難係諗擺邊首Cover歌落去，因為自己有好多好喜歡嘅音樂，又知道歌迷喜歡嘅音樂，咁多歌，要好好思考同安排。」

距離演唱會還有個多月的時間，Cloud除了努力減肥，還有練氣和訓練膽量。她說：「我上台時經常性會好緊張，然後會手震腳震，所以就去咗跳Bungee Jump(笨豬跳)練膽，都幾有趣。」回想起月初決定挑戰笨豬跳，Cloud稱之為「俄羅斯練膽大法」，說：「都係一個機緣巧合，當初有計劃宣傳演唱會，想Bungee Jump跳落去時講『我要開演唱會啦！』但我驚到忘記咗，所以跳落去就講咗其他嘢，好似『好叻呀！我做到啦！』當時情緒好激動，好多嘢就講咗出嚟，好開心。呢個Bungee Jump激發到我好多，原來驚都可以做到。」

首次開個人騷絕對是人生大事，Cloud被問到假如只有5張門票，會邀請誰入場見證？她說：「首先一定係Daddy、媽咪、阿妹，仲有兩張飛我想請公公同婆婆，佢哋喺海南島加上年紀大，唔知佢哋會唔會搭飛機過嚟，但都好想佢哋睇到。」孝順的Cloud揚言會準備經典歌曲唱給公公和婆婆聽。