食物放入口前要睇清楚！有網民近日一間連鎖的麵包店買了一個合桃提子包，惟進食時，赫然發現竟藏有大條長形螺絲釘，怒斥「如果老人家或小朋友食咗咁點？食唔死都一口血啦」。

有網民在社交平台threads發文表示，本月14日，周六早上於觀塘APM B1層的A1 Bakery買了一個合桃提子包，返到公司切開後放烤爐翻熱後，赫然發現竟藏有大條長形螺絲釘，「個包係長形，都幾大條，所以焗出嚟應該睇唔到入面出事的。我切時都唔知，直至由焗爐拎出來，見表面有D燶，我用把刀去批走燶咗嘅地方先見到個鏍絲釘。」

事主怒斥，「如果個釘在麪包中間，我已在醫院打呢段嘢」、「如果老人家或小朋友食咗咁點？食唔死都一口血啦」，事主已去信A1客服及食環作出投訴。

帖文引起網民熱議，A1官方的帳號亦有留言回覆事主，「您好，感謝您的反映，小編在此就您是次不愉快的購物體驗深表歉意，顧客服務部同事辦公時間為星期一至五，因此暫時未能回覆您的訊息。但我哋呢邊都先幫你向相關同事反映情況，亦要麻煩您幫忙完整保留產品及異物，以助我地內部調查事件，感謝您的協助並再次就事件致歉」。

然而，A1的官方回應卻反令網民不滿，「你呢啲客服行政咪唔掂囉～全香港有幾多行係輪休？你哋做客服嘅就只番一至五，六、日全個部門全世界休息，但出親事搵客服就梗係多喺星期五晚、六同日，點解你哋唔可以on shift?」、「仲要等你地CS返工覆?比我就直接報食環，你地慢慢休息啦」、「星期六日唔開工，唔回得個客都算，仲要個客留住件麵包等你啊？香港咩天氣？麵包擺兩日都發臭啦」、「你都覆得，仲唔醒水叫個經理打住電話比個客道歉先，仲要個客等星期一」。

樓主亦指「作為一個顧客，我只想知道你哋個廚房發生梗咩事？咁大條釘，我以為去咗工地買咗麪包。抑或今日仲有其他麪包都有釘？？」A1官方再度留言指「內部同事已經跟進事件及調查中～但處理需時，望大家見諒」。

有網民認為成件事好危險，「好在唔係放入微波爐⋯」、「呢啲唔小心，真係接受唔到喎⋯螺絲會死人㗎 」、「平時會放微波爐叮熱可能會爆炸」、「真係離Ｘ哂譜，唔該你哋認真處理一下 」。

有幫襯過的網民留言指遇過類似情況，「今年買過A-1嘅生日蛋糕，啲士多啤梨個底係發毛，拎起啲士多啤梨個蛋糕係酸臭晒，小朋友成個生日會就咁破壞晒，俾左百幾蚊，個蛋糕就收番，A-1有咩做唔出」、「我幾年前都試過一個A1包係入面有一大舊膠係入面，A1只係會叫你拎返個產品同異物俾佢地同埋只會賠返果一件貨嘅錢俾你。都係話會調查呀會檢討。」、「我都試過，打電話投訴，佢會叫你去返apm鋪拎$10coupon打發你」。