丘嘉滎

上星期日賽前估計打風會影響跑道狀況，點知馬會「力場」真係有料到繼續發威，唔止賽前雨水唔多，賽日都無乜落雨，所以無論係泥地定草地都繼續大利貼欄馬匹。

第七場四班千四快馬唔多，預計只得「時尚歡欣」同埋「做好自己」前置，兩匹賽駒上仗都有好成績，不過「時尚歡欣」今季演出較飄忽，不如揀番有明顯進步嘅「做好自己」，馬匹上場快閘遇上「精明選擇」漏閘，「做好自己」眨吓眼就埋到貼欄包廂位，縱然馬匹賺晒形勢但贏甩兩個馬位，而且賽事完成時間亮眼。

今場「做好自己」再次排中外檔，就算冇上場咁好形勢，睇番前仗馬匹以超快速領放都所負不遠，而且睇埋馬房部署，上次贏馬前試大閘有追勁，今仗賽前彈草閘步幅開揚狀態保持，希望可以再下一城啦！