兆　文

第二場第五班1600米草地。蔡約翰馬房的「駿彩飛馳」畢竟年輕，落到五班佔優勢，大前仗出爭同程，入到直路打算移出時卻持續內閃，以致難於推騎，衝得唔順之下負於頭馬「神駒馬靈」兩馬位，後駒贏馬後重返四班一再上名，亞軍「皮具大師」之後三戰獲兩冠一季。

「駿彩飛馳」前仗谷草1650輸得較遠，然而檔差焗留，仲要遇慢步速非戰之罪；至於上仗跑番同程屈居第四，同樣受制慢步速，看三甲馬沿途留守一、二、三位，而「駿彩飛馳」交出8 8 8 4走位，也是唯一留守後邊而改變名次馬匹，足見目前分數極有利。此駒馬主乃榮智健女兒，蔡約翰必定會有交代，今次抖夠試兩課大閘志在必得。

第十場第三班1200米泥地。姚廄「扶搖勢勁」初出配金誠剛，仍捧到35蚊充滿信心，結果不負眾望輕勝而歸，並壓倒之後取得連捷的「錶之星河」，更吸引1.08.27，同晚三班頭馬「德心知遇」締速1.08.15，而且「德心知遇」接戰再建一功，呢席頭馬貨真價實。「扶搖勢勁」上仗捧到13蚊唔意外，未能連捷當然失望，但考慮到一下子加磅太多，三歲馬要孭磅作賽，當日場地又極利放頭馬，不敵畀佢輕9磅的「天天耍樂」絕對唔失禮。質新馬跑磅唔跑分，尤其「扶搖勢勁」本身身型細隻，上三班孭輕磅仲好，補中冇難度。