香港文匯報訊 葉子楣（Amy）日前於酒店宴會廳舉行「華麗相聚之夜」生日派對慶祝58歲生日，宴請一眾好友包括胡楓、陳欣健、黃玉郎伉儷、樂易玲、馬來西亞酒店拍檔Evians、麥當傑、舒雅頌、譚倩紅、文雋、夏文汐、周美鳳、鄧英敏、黃錦燊、連炎輝、關寶慧等，他們携同精心挑選的禮物到場祝賀壽星女。

宴會開始前，兩邊屏幕先播放由Amy孩童時代至今天的照片所剪輯成的短視頻，及後Amy好友陳欣健（Philip）到台上說：「如果要用一個字形容Amy，呢個就係『大』字，因為佢真係好大方，而且佢大情大聖，佢嘅生活同埋職業都係大起大落。我識佢嗰陣佢只係一個少女，其他人話佢靠身材於是改咗個花名畀佢，但大家記住喺嗰個年代整個社會同埋電影界都係好嚮往，甚至乎係迷戀喺一啲女性嘅性感嗰度，但係因為Amy有咁嘅天份，所以佢能夠係娛樂圈好快就有一個突破，當時佢忙到經常都見唔到佢。雖然佢咁成功，但佢突然間因為遇到一個佢好愛嘅男人，佢可以好大膽咁放棄一切，洗盡鉛華，放棄咗佢嘅名利同埋社交活動，好悠遊咁同佢心愛嘅男人靜靜過佢哋嘅幸福生活。但人生就係咁，當Amy佢係咁無求嘅時候，上天就畀咗一個折磨佢，奪去咗佢心愛嘅男人，但呢一個挫折並無打低Amy，佢外表雖然係好嫵媚，但係佢嘅性格係非常剛強，佢唔單止冇被打低，重更加珍惜原來人生原來係咁珍貴，佢身邊嘅人係咁寶貴，佢要擁抱現在，唔好怕任何嘅嘢，於是佢就學識咗點樣去愛朋友，同埋幫助弱勢嘅人。」Philip還說有驚喜送給Amy，原來是黃玉郎把那幅為Amy畫的肖像畫裝裱起來，附上親筆簽名送給她。

得到眾多好友的生日祝福，Amy感性說：「今晚實在太多嘉賓，我唔逐個去介紹，不過首先要多謝修哥，因為佢94歲都嚟參加我嘅Party，佢係我最尊敬嘅前輩。第二個要多謝嘅係Alan連炎輝先生，佢做好多善事，同埋佢成日包場請大家睇戲，支持香港電影，我知道明年2026年係馬年，電影就會興旺，所以大家唔駛擔心。我都要多謝我嘅馬來西亞拍檔Evians，我本身係拍戲嘅，但突然間識咗佢，令我有機會走去商界，投資酒店，我會多多向佢學習。我都要多謝親姐姐，得佢一個人夠膽鬧我，因為係兩年幾前，我出返嚟被記者影到相，佢竟然話我做乜出嚟，你出返嚟就被人指指點點，我同佢講做我哋呢行已經習慣被人影，因為我覺得唔會全部人都鍾意你，亦有人會唔鍾意你，我已經習慣，我記得周星馳都被網民批評過，不過佢答咗呢六個字『佢未了解我啫』，其實啲人唔了解我唔知我性格，但我亦都唔會同佢哋解釋，我覺得我就係我，做我自己係最開心。」

在晚宴期間，胡楓、陳欣健、黃玉郎伉儷、舒雅頌、夏文汐、楊仲恩、李思捷、蘇姍及龔柯允等也有上台唱歌送給壽星女，Amy也隆重其事換了另一套衣服出來再度高歌一曲草蜢的《失戀》，及後她表示這個生日會令她最難忘的是來自所有朋友的祝福，又和她一起過生日，令她渡過一個開心的晚上。