【地表最強】焦點弗到不得了

兆　文

第一場第五班1650米。「焦點」昔日佳作欠奉，今季加盟游廄終於大有進展，首戰跑谷草1200即得第四，接戰再跑該路程火速補中，但要留意當時跑法後追，前速相當慢，故此失去新鮮感之下，之後再跑1200甚至增程1400都短。

「焦點」季中改攻谷草同程，路合進取表現出色，328場僅以鼻位之微飲恨，接戰398場則只輸短頭位，早前回了一輪氣後，到上仗重返同程再度上名，換言之季內同程三戰悉數躋身三甲。今次抖夠再戰充滿誠意，更有埋潘頓助陣，稱得上人強馬壯，睇埋上周四草地拍跳渾身是勁，近日踱步課課谷起雞公頸，狀態托弗，放心捧場。

第九場第三班1200米。「安康萬里」上季成為呂廄衝冠籌碼，三歲三捷，或許用得過急，今季四歲未能更進一步，頭九戰僅得一次上名，令人失望。此駒曾兩捷1400，但今季跑短途才好，先於田草1200入位，最近轉戰谷草同程更重拾佳態，一連三仗找獲亞軍，目前性能寧短勿長。

「安康萬里」前仗找到潘頓助陣，無奈排9檔形勢不利，焗住留後被慳盡腳程的「飲杯」拋甩，至於上仗3檔守好位，這次卻遇上班利老馬「人和家興」，後駒接戰二班強組都上名，僅以鼻位之微飲恨。今次「飲杯」改配黃智弘未必舞得掂可望反先，仲要落埋新配備，幕後擺明志在必得。