【地表最強】舞林密碼弗到爆燈

兆　文

第五場第四班1000米。「拉合爾」初出爭同程排12檔是好位，但之前試閘走勢平淡，故此是47倍大冷門，出閘不快被重重圍困，與亞軍「鼓浪高升」同樣處於不利位置，到前面望空時，衝刺際遇又不如貼外欄的「鼓浪高升」般暢順，最後僅輸馬頸位相當出色。

「拉合爾」上仗再戰直路賽排11檔，又一次以頸位不敵，這次則拚獲季軍，僅不敵兩匹熱門，表現合格有餘。今次吼準直路賽再來，用到潘頓稱得上人強馬壯，再看最近試閘有前有後唔算差，周四出跳加埋眼罩聚精會神，勇熟程度更進一步，有「舞林寶典」在陣分頭又唔錯，值得一博。

第七場第二班1400米。「舞林密碼」跑法相當多變，元旦日贏1200一役，走位係4 2 1，之後兩次在1400入位則屬後追，而黃智弘早前騎兩次跑1400係搶頭，前仗改配湯普新新縮番1200，由於排11檔留到尾列，但依然勁追第六名只負個半馬位。到上仗回師1400，又一次用番快跑法，結果僅以四份三位之差不敵大熱門「包裝天將」。今仗「包裝天將」已不在陣中，仲要有快排埋靚檔，大有機會置身靚位形勢大好，更重要「舞林密碼」過往甚少密密出戰，近期得以作此安排，今次賽前更進行快跳，得以積極備戰，狀態弗到不得了。