【地表最強】「風雲武士」戴罩更堅

兆　文

第六場第三班1200米。「風雲武士」上季第二戰已交出頭馬，其後升三班再下一城，今季69分起步，季初一直在沙田出爭，亦曾嘗試挑戰三班條件限制賽，不過最終亦未能取頭馬。三月起轉爭谷草出擊，首度出爭後追第五，場地已試準，其後再出三場皆飲恨奪亞，每一次跑出快時間，無奈都輸少少。

「風雲武士」本身有天生前速，轉爭谷草的確相得益彰，再看今次的對手比起近仗弱得多，而且有運地排埋2檔起步，形勢由弱轉強；至於改配眼罩更有好冇壞，因為上周四用此配備彈閘，全程墜手起勁之餘，而且步伐整齊流暢，可肯定眼罩給予極正面作用。

第九場第三班1200米。「鈦易搵」首季新馬賽已露一手，初出立即勝出，之後三戰表現雖差，幸好翌季撥亂反正，首兩戰入位，第三仗爭條件賽，既贏更大勝而歸，難怪升上三班持續神勇，好快再建一功，而且全季十一戰悉數拚獲金名次，表現準得交關。

來到今季，「鈦易搵」演出同樣準繩，僅兩仗不入前五名，來到近期重返谷草發揮尚要再添兩勝，而這兩次都跑出超快時間。下年才轉六歲的英國馬，耐戰力強不斷進步，升上二班絕對不落下風，仲要對上兩戰同程俱勝，足見谷草威力強大，今戰步速必快有利後上跑法，分頭又唔錯，有買趁手。