香港文匯報訊（記者 子棠）今年踏入「男人50」的黃浩然日前接受電台節目訪問，分享本月13日起夥拍連詩雅、姚焯菲、Tiger@MIRROR等後輩演出首部音樂劇《三．八》，以及6年前離開了服務13年的TVB重投電影圈等因由。

黃浩然表示中學時已參加不少聯校歌唱比賽，1996年入行之前也學過兩年唱歌，原本朝着唱歌及拍戲發展，可是拍戲已令他應付不來，今年重拾放下近30年的唱歌興趣，接受《三．八》挑戰，包辦演、唱、跳，他形容心態一如6年前離開TVB舒適圈般：「TVB嗰13年收入OK，工作雖然辛苦，但係好感恩，我唔係親生仔（經理人合約）都好多機會。」當年有報道指黃浩然離巢是因為他不是親生仔，以及與視帝或男配角獎無緣而心淡，黃浩然澄清道：「唔係，我只係想試多啲嘢！因為我睇到我兩個仔五六年前不停作新嘗試，細細個都咁有勇氣，令大人都有啟發，想到要突破自己，完全跳出既定的框架才好玩。」

今年亦是黃浩然與太太KAKA結婚20周年，出名「好男人」、「好爸爸」的他一直零緋聞。問及如何避開娛樂圈常見的狂蜂浪蝶？他謂：「我無遇過，其實好多女演員，包括楊怡都話『我無黃浩然電話，佢唔會畀電話人』。我以前真係好少畀電話異性，係咪刻意避？因為我都會驚，無端端半夜兩點有個異性WhatsApp你，你話會點？如果對方無你電話，咪唔會WhatsApp到你，你話我避就避啦，以前我真係咁諗。」

至於夫妻共渡最艱難的一關，黃浩然坦言是他在2014年免疫系統出現問題，歷患「貝賽特氏症」的時期，最危險可去到死亡，當時一度停工數月，原本主演的劇集《張保仔》也要被易角；他說：「那時候必須即時休息，公司好快搵到人代替我嘅角色，我就明白到好多嘢包括工作，都可以有人替代你，但係唯獨做爸爸、老公、為人仔女嘅身份，係無人可以取代；之後我做任何事都要取得平衡。回想未病發前的工作狀況，好多人聽到都會『嘩』一聲，嗰十幾年除了大年初一二三，其他日子都唔會放假，有得瞓嘅日子都係瞓4個鐘；試過最長通告係同時拍《公主嫁到》及第二輯《巾幗梟雄》，一個月內連續拍60個鐘，真係幾辛苦，現在人大了，明白唔好為某啲事做到咁極端。」他稱6年前轉投古天樂的經理人公司，就是因為公司理解他重視工作與家庭之間的平衡。