【地表最強】「精英雄心」度身訂造

兆　文

第六場三級賽1600米草地。「玩笑」來港首戰即有驚喜，排14檔孭134磅，牌面極蝕都入位，再出慢閘失機焗留，一樣如飛殺上追獲第四，去到第三仗熱捧順利贏馬。之後跑了五仗，當中三仗是四歲系列賽，另外兩戰在二班上陣，分別獲得1冠1季，其中贏馬一仗正是出戰同程1600米，走位11 10 9 1已經出色，更吸引季軍「陽光勇士」再出大勝，早前更在一級賽冠軍一哩賽上名。再看「玩笑」在三關四歲系列賽表現，除了首關走不利路段以致包尾，之後兩關都所負不遠，甚至在香港典經盃拚獲季軍，足見能力高超，出爭三級賽孭輕磅絕不落下風，尚要抖夠操足，單係大閘都試了三課相當積極。

第十場第二班1650米泥地。「精英雄心」上季來港，首五戰跑草地得個近字，最後一戰初跑泥地立即得手，當時60分勝出三班賽，更輕鬆贏夠一又四份三馬位。泥地試出彩虹，今季初主攻泥戰，首戰1200路短照上名，翌仗爭同程熱倒快步速跟得急，幸好之後一戰迅即補中，就算之後兩戰同程未能再贏，次次排大外檔拚獲亞季軍亦有交代。「精英雄心」早前改攻草地連輸三仗，上仗跑番同程首本戲再現虎相，負重磅僅僅不敵雖敗猶榮。能力足以在二班取勝，最重要磅位如釋重負威力大增，再看今戰對手不是跑開草地就係短途馬，有埋廄侶搶前確保步速夠快，贏馬呼聲高唱入雲。