香港文匯報訊（記者 梁靜儀） 梁芷珮（Christy） 以VIP身份獲邀出席巴西里約熱內盧狂歡節學跳森巴舞，拍《潮什麼》適逢結婚21周年，與老公天空之鏡撐枱腳勁Sweet ，親揭婚姻保鮮大法：咩都會攞出嚟傾。

Christy擔任主持的旅遊節目《南美潮什麼》，昨晚（14日）一集她以VIP身份獲邀出席里約熱內盧狂歡節，體驗當地最具魅力的花車巡遊；Christy還試穿了手工製作的森巴女郎服裝，色彩鮮豔加上釘滿閃亮珠片，又向導遊學跳森巴舞，Christy自嘲手腳唔協調似足企鵝。

明晚（16日）播出的最後一集，Christy會去到巴西桑托斯，該處街道的牆壁隨處可見比利塗鴉，整座城市彌漫着足球的熱情。難得踏足足球聖地，Christy 自然要到比利博物館朝聖，該處展示了不少比利穿過的球會衣服，當中不少球衣上還殘留污漬，既真實又珍貴。

這次「潮什麼」旅程對於Christy可謂別具意義，皆因撞正她與老公Kenneth結婚21周年紀念正日，二人當時更身處既浪漫又坐擁天堂美景的玻利維亞天空之鏡—烏尤尼鹽湖，手持紅酒配美景的Christy興奮高呼：「今日係我哋21周年，我哋仍然都係sweet sweet！」談到婚姻21年仍能保持甜蜜的秘訣，Christy透露：「我覺得我哋份工幫咗好大忙，因為去旅行係一件好開心、好放鬆嘅事，而我哋嘅工作就正正係需要旅行，所以我哋長期都keep住好開心。」她續指：「本身我哋性格都係開朗嘅，同埋咩都會攞出嚟傾，因為都咁耐啦，所以我哋好知道大家需要啲乜嘢，傷感情嘅事會盡量避免。」Christy又坦言二人工作方面甚少分歧：「我會好respect老公、好聽佢講，因為每人都有自己嘅長處。」

Christy在天空之境還體驗了另類焗桑拿—雪鹽浴，對於遭白雪雪的鹽鋪滿全身，Christy笑言：「啲鹽好重、好似啲人踩住我嚟按摩咁。」