極品西客！網上瘋傳日前在一間爭鮮壽司店內，有食客爆粗大鬧職員，疑因不問自取店內豉油被阻，其後更掟錢辱女店員，「你搞我啊嘛，係咪你搞我啊！......同我數夠千五蚊豉油！」。不少網民看後怒斥該食客「影衰香港人、影衰男人」。

有網民在社交平台threads上載一段彩虹坪石邨爭鮮迴轉壽司店的影片，可見一名戴白色Cap帽的大叔在店內大鬧，因他不問自取店內豉油被阻。樓主指，男子前來買外賣，「根據店員嘅講法，當時呢位戴住白色Cap帽嘅阿叔嚟買外賣，而爭鮮對於外賣要俾幾多包豉油不嬲都有規定，不過阿叔就嫌豉油少得滯，所以自己隨手攞多幾包，問都唔問下，所以店員就當然提點一下」，結果大叔突然發難。

影片所見，大叔情緒激動，對住店員大鬧，「我X你老母！我無錢買嘢啊？無錢食飯啊依家？」。其後大叔越鬧越起勁，一句「X你老母臭X」，又多次將錢掟在枱上。樓主表示，「店員話阿叔當時攞左張500蚊紙出嚟，話要買晒所有豉油。」大叔之後亦多次做出大力掟錢的動作，並不停怒罵：「數啊！再數啊！再數啊！」。

其間，女店員都保持住良好的態度，但大叔仍鬧到成間爭鮮都聽到，「主要就係想表達自己有錢，想要千五包豉油都仲得之類嘅說話」。影片可見，大叔爆粗大罵「係啊X你老母啊！係咪無錢食飯？無錢食飯啊依家？」、「我嚟買嘢食，攞兩個鼓油，你同我講嘢！」，並望一望枱上的紙幣說：「你同我數！數夠千五蚊鼓油！X你老母！」

樓主指，「店舖裡面嘅食客終於睇唔過眼，全場一齊x返個阿叔，姨姨更加話阿叔係『影衰香港人、影衰男人』」。而另一段影片可見全場食客起哄，一片噓聲，多人以粗口怒轟阿叔：「走啦！」，有女食客大聲怒斥「影衰晒啲香港人啊！恰女人！Ｘ街！......公憤，離晒譜啊！影衰晒啲男人。」最後大叔竟罔顧眾人不滿，無賴地舉起手來，將噓聲當作喝采聲，影片至此完結。

樓主強調帖文原意並非要公審大叔，只是想分享下呢個好有獅子山精神的場面，「可以見到一班本身唔識嘅街坊一齊同聲同氣、見義勇為，為不公義嘅事發聲，我諗係好難得會出現。而對於呢種事情嘅處理方法，絕對係比『報警』更有效」。

影片引起網民熱議，不少人指責大叔離譜，「其實好肉酸，咁大男人為咗豉油嘈咁耐」、「掉錢嗰下先黑人憎」、「又係呢啲年紀阿叔，幾廿歲人都唔化」、「又貪小便宜，豉油都唔放過，又唔識禮貌」、「店舖有寫明，員工都係跟規矩做，唔洗下下都問候人娘親」。

有網民大讚服務員態度良好，非常專業，「真係好佩服個服務員」、「做服務業真係見好多呢啲」、「而家啲後生出嚟做服務性行業都好慘，成日都好無理受啲氣」。亦有網民大讚街坊見義勇為，「指責破口大罵的男人，英勇」、「大快人心」、「結局令人暖心」。