劉德華監製及主演、邱禮濤編劇及導演的電影《獵金·遊戲》，揭露金融投資市場中的殘酷真相，更揭示行業的暗黑潛規則，戲中劉德華飾演的首席分析師更遭徒弟歐豪出賣，華仔坦言戲如人生，他現實中也曾遭信任的人出賣，變得與人斤斤計較，但他最後還是選擇原諒，這樣做人會更開心，運氣都變好。
《獵金·遊戲》以股票市場為題材，邱禮濤指股票市場跟大家息息相關，也是經濟寒暑表，不買賣也會受到影響。而過去擅長拍動作爆破戲的他，今次轉拍股票「戰場」，他表示早期他也不是拍動作片，而文戲看似比爆破戲易拍，其實也要能打動觀眾，鏡頭畫面要傳遞到訊息。不過今次拍股票市場必須做足資料搜集，資訊上不能出錯 。而邱禮濤也有做個人投資，他總括沒損手獲得正數。
今次劉德華飾演投行首席分析師，他表示幸好有曾演出《東方華爾街》的經驗，對股票有多些了解，然而上次是英語對白，今次涉及香港股市的專屬名詞，他事前需要背到滾瓜爛熟：「比起拍愛情片難好多，我都未試過咁用心做筆記，每日好似默書，又要好似平日生活日常講話，我入行以來都未試過花咁多心機同時間，就好似當年我演康𤋮，都要背好多對白。」問他是否還是想做「拆彈專家」？華仔笑說：「又唔係，今次都幾開心，之前都係外邊前線搏命，今次返辦公室做文人，突然覺得自己係李白。」
想讓頭髮自然白示人
戲中華仔一頭白髮造型顯穩重，他笑稱只是選夠有型，問他是否卸下偶像包袱？他笑答：「一向無，唔知點解變有，無包袱都咁！」不過華仔表示未來打算不將頭髮染黑讓它自然白示人：「之前我仲懶叻話我無染頭髮，但疫情時會諗唔知點算，就開始有白髮要染，不過再生多啲白頭髮就唔染喇，睇美感同角色要求啦，唔可以每次都係花白髮。」至於他演完首席分析師，投資理財是否更精明？華仔不認為如此，仍然秉承其「唔叻唔好諗」的概念，尤其現在買「磚頭」也不一定穩陣，所以會選可以保本的。問他買什麼才穩陣？華仔笑說：「投我哋嘅電影，幫你保本嘅！其實世界上無話咩穩陣，要好謹慎，我有將自己某一啲嘢變做定期，可以畀家人簡單地生活，多出嚟嘅咪搏命囉，當玩輸咗都唔傷身，咁就最理想。」
談及華仔有場危坐高樓大廈天台戲，華仔表示有靠CG效果也有背景實拍，做足安全保護。而戲中華仔被徒弟歐豪出賣，現實中的他又可曾遭出賣？華仔坦言是有，他認為每個人也會有被出賣的經歷，只在於出賣者的世界裏感覺不到，反過來是覺得自己的朋友太固執，作為朋友只是選擇一個更加好的結果，雖未至於戲中那麼戲劇性，但現實中出賣經常發生。問他可會容易原諒對方？華仔坦言：「我選擇原諒，我曾經試過發覺被背叛，我以後就要小心，大家識我這麼多年，我係冇咩機心，但被背叛後我要去改變自己，開始同人計較，長達幾年，但自己生活都唔開心，又選擇『算啦、算啦』，人就開心了，運氣都好啲！通常背叛你嘅都係自己所信任嘅人，唔信任嘅點去出賣，更令人心痛，人生就係咁！」來到今天的劉德華，他已變得豁達，再問他是否會繼續努力幫人？華仔說：「只要能力所及，我一定會！」
有意執導拍輕鬆小品
邱禮濤跟華仔合作無間，二人笑言閒談的題材多到10年內也拍不完，不過其中一部劇情片大家都心儀想拍。問華仔轉戰做導演？華仔直言講了多年想做導演，但至今未找到一個最想拍的題材，他心裏是想拍輕鬆小品，卻又怕喜劇難拍，他又不想考慮拍太沉重的劇情片，所以一直未有定案。
●採訪：記者 阿祖，攝影：北山彥、孫嘉蔚
劉德華 服裝：Prada 配飾：Boucheron
眼鏡：Puyi Optical 造型：Queenie Yu
0
已點過讚
0 / 255