劉德華監製及主演、邱禮濤編劇及導演的電影《獵金·遊戲》，揭露金融投資市場中的殘酷真相，更揭示行業的暗黑潛規則，戲中劉德華飾演的首席分析師更遭徒弟歐豪出賣；華仔坦言戲如人生，自己一樣曾遭信任的人所出賣，變得開始與人斤斤計較，但最後發覺還是選擇原諒，做人更加開心，運氣都變好。

香港文匯報訊（記者 阿祖）《獵金·遊戲》以股票市場為題材，邱禮濤指股票市場跟大家息息相關，也是經濟寒暑表，不買賣也會受到影響。而過去擅長拍動作爆破戲的他，今次轉拍股票「戰場」，他表示早期他也不是拍動作片，而文戲看似比爆破戲易拍，其實也要能打動觀眾，鏡頭畫面要傳遞訊息。不過今次拍股票市場必需做足資料搜集，資訊上不能出錯 。而邱禮濤也有做個人投資，總括他沒損手獲得正數。

今次劉德華飾演投行首席分析師，他表示幸好有過演出《東方華爾街》的經驗，對股票有多些了解，然而上次是英語對白，今次香港股市的專屬名詞都頗「拗口」，他事前需要背到滾瓜爛熟：「比起拍愛情片難好多，我都未試過咁用心做筆記，每日好似默書咁，又要好似平日生活日常講咁，我入行以來都未試過花咁多心機同時間，就好似當年我演康𤋮，都要背好多對白。」會否還是想做「拆彈專家」？華仔笑說：「又唔係，今次都幾開心，之前都係外邊前線搏命，今次返辦公室做文人，突然覺得自己係李白。」

戲中華仔一頭白髮造型顯穩重，他笑指只是選夠有型，是否卸下偶像包袱？他笑答：「一向無，唔知點解變有，無包袱都咁偶！」不過華仔表示未來打算不將頭髮染黑讓它自然白去示人：「之前我仲懶叻話我無染頭髮，但疫情時會諗唔知點算，就開始有白頭髮要染，不過再生多啲白頭髮就唔染喇，睇靚唔靚同角色要求啦，唔可以每次都係花白髪。」演完首席分析師，投資理財是否更精明？華仔不認為如此，仍然秉承自己的「唔叻唔好諗」的概念，尤其現在買「磚頭」也不一定穩陣，所以會選可以保本的。問他買什麼才穩陣？華仔笑說：「投我哋嘅電影，幫你保本嘅！其實世界上無話咩穩陣，要好謹慎，我有將自己某一啲嘢變做定期，可以俾家人簡單地生活，多出嚟嘅咪搏命囉，當玩輸咗都唔傷身，咁就最理想。」

談及戲中華仔有場危坐高樓大廈天台戲，華仔表示有靠CG效果也有背鏡實拍有先做足安全保護，邱禮濤笑指跌親都不會跌死，而且華仔身手好敏捷。而戲中華仔被徒弟歐豪出賣，現實中又有否曾被出賣過？華仔坦言是有，他相信每個人也會有被出賣過，只在於出賣者的世界𥚃感覺不到，反過來是覺得自己的朋友太萌塞，作為朋友為他選擇一個更加好的結果，但自己的世界與對方世界不一樣，雖未至於戲中那麼戲劇性，但現實中出賣經常發生。但會容易原諒對方？華仔坦言：「我選擇原諒，我曾經試過發覺被背叛咗，我以後就要小心，大家識我這麼多年，我係冇咩機心，但被背叛之後我要去改變自己要同人計較，試過幾年但自己生活都唔開心嘅，又選擇番算啦、算啦，人就開心番，運氣都好啲，儲好多負能量好辛苦！通常能夠背叛你嘅都係自己所信任嘅人，是信任令你好心痛，唔信任嘅點去出賣，人生就係咁！」來到今天的劉德華，他巳變得豁達：「依家，皮外傷就算啦，唔係要你條命，其他咪當皮外傷囉！」會繼續努力幫人？華仔說：「能力所及嘅我一定會！」

戲中華仔跟演歌手的倪妮一段情好有火花，華仔直言大家拍攝時能互相信任，導演又讓他倆盡情發揮，尤其戲中兩人酒不離手，華仔因自己向來滴酒不沾便用假酒代替，他跟導演就迫倪妮邊飲酒邊拍，做到微醉的效果。華仔解釋，他本身肝不好向來不飲酒，加上一飲就眼瞓，所以一班人飲酒時都不喜歡他在場說他太清醒，但他就的會記低各人的醉態，所以在《孤男寡女》一幕醉酒戲他演得好神似。至於倪妮一開始是他們迫她飲，之後她就不停飲，邱禮濤試過見她飲了一支酒要喝止她再飲，華仔則會跟她講話東拉西扯，結果她就忘記再拿起酒杯。

邱禮濤跟華仔合作無間，二人笑言閒談的題材多到10年內也拍不完，不過其中一部劇情片大家都心儀想拍。而華仔近年多兼任電影監製，他表示都要看是否適合怕幫倒忙產生矛盾：「好似徐克真係有施南生互相依靠同依賴先得，做監製有時我幫到，有時我幫唔到部戲，都要選擇。」轉戰做導演？華仔直言講了多年想做導演，但至今未找到一個最想拍的題材，心𥚃是想拍輕鬆小品，卻又怕喜劇難拍，太沉重的劇情片他又不想考慮，所以一直未有定案。

劉德華credit :

服裝： Prada

配飾： Boucheron

眼鏡： Puyi Optical

造型： Queenie Yu