【滎心一言】新幹線走順速達

丘嘉滎

最近天氣反常，上兩星期幾乎日日萬里無雲，跑道淋幾多水都係乾快地，草泥內欄都有明顯優勢，不過呢兩日濕度同溫度都起變化，雖然未知會否一再利前置馬，不過C+3跑道特別多快馬報名，所以間中有後追馬因應形勢而跑得好，好似第七場四班千二有「開心樂園」、「有鴻利」等快馬，預計有正常或偏快步速。

韋廄嘅「新幹線」季初排內檔一再上名，對手有「飲杯」同「椒椒醒」等三班實力份子，不過「新幹線」韁口敏感要跑得順方能發揮真正實力，馬匹近兩場轉跑沙田，難得千二嗰場排12檔，全程走蝕位都所負不遠，上仗跑千四擺明求減分，跑兩場田草順利減4分，評分同贏馬時相若，今仗「新幹線」回師谷草爭首本路程，田泰安對上一匹頭馬「祥勝力駒」都係同韋達合作，希望再下一城啦！