【粵語講呢啲】捉痛腳·撳住搶；撳水魚；劏水魚·鵪鶉·撼頭埋牆

梁振輝 香港資深出版人

「痛腳」指疼痛的腳，喻短處、缺點、弱點或把柄，用以進行交涉或要脅的憑證。廣東話的「捉痛腳/捉人痛腳」相當於抓住人家的把柄，與以下用詞意近：

揭短；揭瘡疤/挖人瘡疤；抓辮子/抓小辮子

「撳」，讀「禁3-6」，有按壓的意思。「撳住搶」就像某人被按在地上，動彈不得，不得不任由宰割。

「鱉」，讀「別6-3」，是一類軟殼龜的統稱，俗稱甲魚、水魚、王八等。「軟」予人軟弱的感覺，擁有此特性的物質容易被壓迫。「水魚」的殼是「軟」的，所以如「畀人撳」（遭人按壓），其背部會輕微下陷。廣東人會用「撳水魚」這個講法來描述一種欺詐無知者的手法；也有以下的講法：

劏水魚；當佢水魚咁劏（劏指屠宰）

示例1：

嘩，成班「水魚」行緊過嚟，「撳」好趁手嘞！

你班大哥「食水咁深」（牟取暴利），依家佢哋已經「醒水」（有警覺性），唔似得以前咁樣咁容易畀你哋「劏水魚」㗎嘞！

「鵪鶉」，讀「庵春」，是一種屬雞類的鳥。由於其身形笨重，不能飛得太遠，更不會高飛，很容易被人捕捉；尤其入夜落地（多於山間草叢）之後，更已是筋疲力盡，任人用手捕捉。現今「鵪鶉」已被普遍視作「弱雞」（大弱者），即害羞、膽小、軟弱無能的代表。

示例2：

Patrick，平時你就也文也武，乜得今次你咁「鵪鶉」（表現膽怯）嘅？

世上冇醜嘅女人，只有懶嘅女人；又有人話，世上冇醜嘅男人，只有「鵪鶉」（怕醜）嘅男人。

「撼」指搖動。如：搖撼。廣東人會用「撼（讀「坎」）」來借喻撞擊。如：撼崩牙（牙因撞擊而崩缺）、撼頭埋牆（把頭顱撞向牆壁）。

個案1：

你假假地都係博士，仲新聞時時有講，都畀人電騙咗成千萬，「撼頭埋牆」喇！

因「撼頭埋牆」有致命的可能，所以叫別人進行這個行為就是指：

當事人具有一個極度愚昧的思維；為免重蹈覆轍，不如死去作罷。

個案2：

稍為有啲社會經驗，都知「借大耳窿」（向高利貸借錢）冇好下場；同「撼頭埋牆」冇咩分別！

「撼頭埋牆」相當於「找死」（自討苦吃）。

有人做錯事後「揼心/揼心口」（椎心/椎擊胸口）；也有人「撼頭埋牆」，以示懊悔或極度悲痛。