古淖文舉行首場《I'm Home》演唱會：「我要多謝香港。」

香港文匯報訊（記者 子棠）古淖文昨晚舉行首場《I'm Home》演唱會，得到周梁淑怡、何麗全、韋綺姍、周國豐、張佳添，以及參加《亞洲星光大道》比賽時的一班戰友捧場。

連唱多首歌曲揭幕後，他跟觀眾說：「真係冇諗過喺半年時間就可以開第二次演唱會，雖然主題都係叫 l’m Home，大家可當一個新演出，因為今次係為香港做一個新嘅 show。我要多謝《中年好聲音》這個節目，如果我冇參加比賽，我相信唔單止呢兩場演唱會，由我得到冠軍到而家所得到嘅嘢都唔會擁有；我要好多謝大家陪我哋由寂寂無名，由鹹魚翻生，到而家喺街度有人嗌得出我哋個名。我仲要多謝香港，點解？如果我真係冇踏出呢一步，鼓起勇氣再次參加比賽，大家應該唔會記得古淖文呢一個人。當然還要多謝我嘅父母，因為由我決定做歌手到今時今日，佢哋比我好大自由度去闖呢條路，我唔敢講我而家好叻，只係有少少嘅成績，但我會繼續努力去唱多啲歌去報答我嘅爸爸媽媽；最後我要多謝呢個人正正就係我自己，我好多謝我嘅任性，因為如果我唔係一個極度任性嘅人，我應該一早放棄咗唱歌，好彩我冇放棄到。」