方中信獲金莉花獎最佳男配 衛詩雅華鼎獎封后 金像獎提名增信心

香港文匯報訊（記者 子棠）衛詩雅（Michelle）憑電影《破·地獄》在前晚澳門舉行的第39屆華鼎獎中奪得「華語最佳影視女演員」；方中信則憑電影《金手指》於第三屆澳淶塢國際電影電視節金莉花獎獲得「全球最佳男配角」獎項，而石修及歐陽震華受邀擔任「全球最佳男、女配角」及「全球最佳女演員」頒獎嘉賓。

衛詩雅表示得獎心情非常激動，認為對她來說，無論任何獎項都是一個肯定及被看見的機會，「呢個獎對我嚟講太重要，對演員嚟講係一個肯定，亦都係提醒大家，我仲喺呢行，大家可以搵我演戲。憑《破·地獄》呢套電影得到獎項，即係代表大家好喜歡我哋嘅電影，所以好開心。（會否增加來屆金像獎提名的信心？）感覺會實在啲，信心係高咗嘅。」

衛詩雅讚許冠文敬業樂業

重提在片中飾演一名救護員，Michelle稱這個角色無論在體能及心理上都有很大發揮，「心理上，係大家睇過呢套電影就會明白嗰種沉鬱，長時間培養沉鬱嘅情緒，每日同屋企人好多矛盾、好多爭吵，所以嗰段時間係難過嘅。體能上，除咗要練一啲儀式上嘅嘢，亦都要做好多體能嘅訓練，因為角色係一個救護員，自己對呢方面要求比較高，好希望最貼近個角色，所以由嗰一刻開始我每日都去做gym，嗰段時間體能真係幾好，同埋大隻咗好多，經過呢啲訓練，之後我真係可以搬到個人上救護床。至於最難忘的一幕係為片中『爸爸』許冠文沖涼嘅戲份，拍攝嘅時候係冬天，好凍，劇組所有人都擔心，許冠文反而話唔緊要，拍到OK先。佢為我哋嘅畫面、劇情需要行先，好唔惜身，我又心疼，覺得好深刻又覺得好犀利，好尊敬佢，喺佢身上絕對學到乜嘢叫做敬業樂業。」

方中信拍浸水戲驚甩假髮

至於方中信亦表示十分開心，他謂獎項並非屬於他一個人的，而是整個拍攝團隊，是大家一起努力的成果。他謂最難忘的是戲中一場他被殺後伏屍泳池的場口，「我記得拍嗰陣時係冬天，其實都幾凍，我要趴喺水面，啲水從鼻湧入去，我都着咗潛水衣打底其實都OK嘅，問題不大。導演佢哋都好好，安全措施做得好好，搵咗兩個潛水員喺池底Stand by，放晒啲氧氣樽，好安全，但係要孭住啲鉛帶，因為要做到半浮沉嘅效果，恐懼就冇，因為我都有潛水。唯一係驚個假髮會甩，哈哈。」