爆藝訓班同學譚玉瑛花名 苗僑偉演戲永不言休

香港文匯報訊 苗僑偉（三哥）前日到新城廣播接受譚玉瑛（阿譚）主持的《QK玉瑛室》訪問，三哥與阿譚相識於上世紀八十年代，亦是無綫藝員訓練班同學，所以分屬好友，三哥搞笑大爆阿譚花名，「佢以前因為個樣好細個，所以有個花名叫譚十一，永遠都好似11歲，又牙尖嘴利，所以喺呢行屹立不倒。」

阿譚問苗僑偉為何會被稱作「三哥」？他稱：「有部電影個角色叫三哥，叫得我最大聲嘅係小黑柯受良，佢離遠見到我就好大聲叫三哥，自始就個個都叫我三哥，叫三哥幾好，又穩陣，又唔使做大哥，大哥有事就二哥頂上，三哥最安全，所以我非常樂意人哋叫我三哥。」

入行超過40年的三哥，形容自己的演藝事業分了兩個階段，第一部分是訓練班後加入TVB，但因「五虎將」合約問題遭公司雪藏，「我同劉德華唔續約就被人雪，之後劉德華入咗電影圈有好大成就，我都係發展電影，但就經常被人叫去客串，當時我有做眼鏡生意，上世紀九十年代初生意仲唔錯，於是把心一橫唔拍戲，專心做生意，做咗14年，到2004年有人買盤，我又有時間，監製梁家樹剛好搵我拍《學警雄心》，就開始咗我人生第二個世紀，2004年復出到現在都已二十年。」

與吳卓羲林峯對戲怕失威

三哥自爆當年復出拍《學警雄心》壓力甚大：「嗰時對住吳卓羲，又係牙尖嘴利，之後又對住黃宗澤、林峯，佢哋同我合作時只係廿幾歲，現在個個變晒中佬，當時拍《學警雄心》好大壓力，好多對白，成頁紙對白我講晒，一路訓話，個身已經濕晒，但又唔可以喺班後生面前失威。」

阿譚指苗僑偉年輕時不懂取悅女生，性格木獨，問太太戚美珍喜歡他什麼？三哥透露跟戚美珍於1982年認識，1990年結婚：「當年大家都鍾意小朋友就結婚，唔知點解咁早結婚，為咗棵樹冇咗個森林，都係緣分啦。嗰時冇諗過粉絲鍾唔鍾意，我冇劉德華咁勁，佢可以保密幾十年，我保密唔到，反正都被人影，不如公開。」

現年66歲的三哥永不言休，直言會做到觀眾不喜歡看自己為止，「我又唔會話幾時唔做，有人搵就做，唔使去強求。呢行做咗幾十年，好講運氣、際遇，再講努力，呢行好多人都好努力，但冇運氣同機會；以前好多人埋怨7日7夜冇得瞓，又要捱通宵，我自己從來唔會埋怨，接咗工作時，當然最好有時間休息，我會交到好功課，好辛苦時都唔會埋怨，盡量去配合。」