烏蛟騰烈士紀念園開幕　麥美娟勉勵學生學習先烈無私奉獻精神

北區民政處9月19日為重修完成嘅烏蛟騰烈士紀念園揭幕，舉行莊嚴儀式。儀式由民政及青年事務局局長麥美娟主持，中央政府駐港聯絡辦新界工作部副部長謝益明、國安公署副局長謝志祥、外交部駐港特派員公署主任劉孝明、駐港部隊大校王志學、新界鄉議局主席劉業強、北區民政專員賴子堅、沙頭角區鄉事委員會主席李冠洪，聯同其他嘉賓參加儀式。

紀念園位於沙頭角新娘潭路旁，園中豎立一支尖塔紀念碑。紀念碑最初喺1951年豎立喺烏蛟騰村內，以誌烏蛟騰村烈士喺日佔期間嘅英勇抗日事蹟，喺2009年搬到現址，並開闢咗呢個紀念園。北區民政處舊年開始籌備重修紀念園，除咗修繕園內設施，亦邀請咗廣州美術學院設計鑄造紀念烈士嘅浮雕，立體呈現抗日先烈嘅英勇事蹟同愛國情懷。園內記載英烈事跡嘅石碑碑文，亦獲香港與華南史專家、嶺南大學協理副校長及立法會議員劉志鵬教授閱正。

今年係九一八事件93周年，而農曆八月十六亦係烏蛟騰烈士當年犧牲嘅日子。為銘紀歷史，北區民政處特別與北區中學校長會同香港沙頭角抗戰紀念館合作，邀請區內四間中學約100名師生參加儀式同參觀紀念園，之後再去沙頭角抗戰紀念館參觀，了解東江蹤隊同烏蛟騰英烈喺香港淪陷期間嘅抗日事蹟。

儀式莊嚴肅穆，嘉賓同師生代表喺麥美娟嘅帶領下，向抗日英烈致送花圈、默哀同行鞠躬禮，然後專心聆聽廣州美術學院教授講解紀念園重修嘅各個設計特點。麥美娟致辭時，勉勵同學銘記同學習先烈捨身取義、無私奉獻嘅精神。

紀念園重修同埋儀式得以順利完成，有賴沙頭角區鄉事委員會、劉志鵬教授、香港沙頭角抗戰紀念館同廣州美術學院嘅協助，同埋北區中學校長會同香海正覺蓮社佛教馬錦燦紀念英文中學、宣道會陳朱素華紀念中學、上水官立中學及鳳溪廖萬石堂中學師生嘅參與，特此鳴謝。