演古惑仔獲鄭浩南讚有書卷氣 黃宗澤把握機會演繹好每個鏡頭

黃宗澤與張繼聰在電影《紮職3》中演古惑仔角色，因為連場動作，大熱天時要從街頭跑到街尾「劈友」拍得好辛苦，黃宗澤笑言如要開拍《紮職4》，他們就要參加跑馬拉松，不過拍攝過程好開心，也慶幸沒整親受傷。鄭浩南和陶大宇點讚他們這班新一代新朋友好有書卷氣，黃宗澤為拍打戲狂操肌保養。◆採、攝：香港文匯報記者 阿祖

黃宗澤表示拍攝中段就扚起心肝叫張繼聰給他健身教練的電話求救。「今次拍跑戲時feel到自己起動好慢，感覺比起以前肌肉流失得太多，冇晒power，所以要重新鍛煉，𠵱家唔使開工會連操4日，有時喺健身室會撞到吳卓羲。」

現練出腹肌見成績？黃宗澤笑言不會隨便拿出來。但練到卻不騷出來好浪費？黃宗澤笑說：「隨便掀起件衫畀人睇咩，又唔係艷星，操定到時有project就用啦！」一身健美身形的張繼聰最有經驗：「我哋拍動作片平時更需要做運動，並唔係要美觀，等如一架車出廠40幾年都變老爺車，所以需要保養keep住，今次拍動作戲又跑又打仍然OK，都做得出來，唔使行埋一邊搵替身。」

精益求精臨場微調

戲中「大佬」鄭浩南和陶大宇點讚他們這班新一代新朋友好有書卷氣，拍戲認真不像當年他們經常在現場玩，黃宗澤多謝兩位前輩，更指前輩的工作態度其實都是這樣的。

張繼聰則笑言：「可能佢哋勁就可以玩，我哋都係唔好玩，玩創個心搞唔掂，其實兩位前輩都好輕鬆，冇畀我哋壓力，一埋位佢哋就係嗰個角色。」

黃宗澤直言：「臨場對稿時，我同阿聰諗到少少嘢，大家都會加落去做啲微調，導演都要知亦加入一齊討論，不過我都係第一次畀前輩讚有書卷氣，做古惑仔都有書卷氣！哈哈！」張繼聰亦笑說：「劈友仲諗點劈法，真係好大學術性！𠵱家市況唔容易，拍咗就冇得改，所以臨拍要練到最盡，而且好係無止境，一路拍就一路刪減，電影比電視更加精要。」

黃宗澤亦認同要把握機會演繹好每個鏡頭，所以在對白上多數會刪減，要一句到肉。至於臨場加入意見，黃宗澤說：「有時臨場對稿會將對白交換講，或者幫人頂一句嚟講，想更顯出兄弟情，即使同Mark哥（鄭浩南）對戲，佢都會將劇本冇嘅擺落去。」

被鄭浩南打張繼聰當肯定

戲中有場鄭浩南要將他們「紮棍」打背作懲罰，鄭浩南打陳家樂時好輕力，但打張繼聰就最大力，拍完後全場爆笑。張繼聰苦笑說：「Mark哥對我有信心，我頂得順，次次都嘭嘭聲，但唔痛嘅，只係打背脊，我就當係一種肯定，Mark哥從小到大都係我哋肌肉界代表，係蛋白質之王，身形靚到不得了，佢打落嚟係一種認可囉，不過家樂可以努力啲，嚟緊湊小朋友要好多時間，但係下次畀人打嘅時候要有信心啲！」不過他仍好開心，因Mark哥令他有啟發，要保持年輕心態，狀態又fit：「佢好有型，收工仲着住條貼身短褲好似有艘船等緊佢出海咁，但我就接受唔到條短褲。」

拍浸桑拿戲惜肉如金

另一場鄭浩南帶張繼聰、黃宗澤和陳家樂去桑拿補償被打，但拍攝時三人惜肉如金，將上身浸到上頸位，黃宗澤笑說：「我係拍完才去健身，show乜鬼body，我瘦到隻積咁！」張繼聰亦笑說：「好難嘅，我第二次拍浸桑拿戲，覺得自己似打邊爐啲材料要浸幾個鐘，平時去桑拿浸2分鐘就上房揼骨，拍戲就要全部人一齊浸喺水中，越拍越迷幻，攰到好眼瞓，所以浸完一次幾年都冇再浸。」大家都很吝嗇身材？黃宗澤認輸說：「在Mark哥面前唔好張牙舞爪啦，𠵱家嘅女士睇男人戲全部都要睇身材。」張繼聰表示為拍戲他事前要操練兩三個月，期間無啖好食，黃宗澤感同身受表示曾經拍劇集《幕後玩家》時，與張繼聰兩個都無啖好食，只吃白切雞走皮過水，日日如是。張繼聰笑說：「慢慢會有價，係唔會咁便宜無啦啦打大赤肋。」黃宗澤認同說：「幾個月才拍個廣告，或者為拍一兩場戲，𠵱家要無端端除衫？畀返啲代價嚟囉。」兩人講到似賣身般？張繼聰指之前去吉隆坡拍戲，全程只食烚雞，又要通宵做運動，回到香港拍另一部戲即要除衫，拍完第二日就狂食，更試過與家人去旅行時食滯了；黃宗澤搞笑指拍完一個除衫鏡頭，着返衫就即吃蝦餃燒賣。張繼聰更笑言如果一直沒展示過肌肉，打大赤肋也不會有壓力：「但觀眾印象你有腹肌，如果你不在狀態，就會話你走晒樣，畀人欺凌，會好唔想聽到呢啲說話。」黃宗澤認同表示有時真的不是每個角色都要去爆肌，要看角色需要。

黃宗澤：服裝：MR PORTER

造型：Queenie Yu

髮型：Kel @HH hair

化妝：Cyrus Lee

張繼聰：髮型：Matt Chau

化妝：PinkyKu MakeUp