在電影《紮職3》中，鄭浩南與陶大宇同飾演社團大佬，兩人曾經在30多年前合作過兩部電視劇，如今首次在電影中相聚，鄭浩南大爆陶大宇在1983年入行，比他早一年出道，所以是師兄。而「失散」30多年後重聚，二人感覺非常開心，原來當年他倆都是家住尖沙咀，是同區街坊，這次合作總勾起滿滿的回憶，他倆笑言正相約找一些以前的京川老店去敘舊，大宇笑指拍完該片有晚去吃涮羊肉，竟有緣遇上鄭浩南，對方就請他飲了一支茅台。 ◆採、攝：記者 阿祖

陶大宇坦言今次拍《紮職3》壓力都頗大，因他是電影稀客，加上他跟鄭浩南同是第三集才加入，但一拍就遇到老朋友和三個未合作過的新朋友張繼聰、陳家樂和黃宗澤，都拍得好開心。而大宇的戲中角色兇狠，殘忍、對任何人都趕盡殺絕，鄭浩南大讚大宇有功力演到這個角色，而鄭浩南拍過不少江湖電影，對上一次演江湖大佬已是《古惑仔》。提到鄭浩南20年無演「大佬」，他笑說：「我私下有做，喺阿仔面前咪做大佬囉！哈哈！」陶大宇即笑說：「我隔籬嗰個咁多經典，你話我壓力幾大？」

大宇拍打戲戰戰兢兢

大宇表示自己一直很少演奸角，他在劇集《大時代》飾演的「丁益蟹」都很孝順，不像今次般壞，但他演得好過癮，不過在現場拍攝時氣氛比較嚴肅，其中一場要在車廂裏邊與張繼聰、陳家樂和黃宗澤打個你死我活：「由於空間有限，武指張文傑度嘅招我都打得好舒服，出來效果都幾激幾壯觀，我亦冇受傷，總之就戰戰兢兢咁應付得到。」鄭浩南習慣拍動作片，其中有場他被伏擊的戲拍出來感覺也不錯，且他都應付自如。

對於張繼聰、陳家樂和黃宗澤三位演員，鄭浩南與陶大宇這兩位前輩都當他們是新朋友，覺得他們工作態度好認真、好勤力，不會像以前他們掛住玩，更是不放過任何一個表現的機會，大宇說：「如果唔得都唔會拍到第三集，一定做到效果同成果，總之我會點讚畀佢哋，完全係好勤力。」

鄭浩南提到拍動作戲沒難度，現只擔心身體會負荷不到：「我就快60歲，喺馬來西亞20年一直都有飲酒嘅習慣，當地人飲酒文化喺聚會之中遲到要罰飲三杯，都係飲『硬嘢』，一杯杯白蘭地清咗佢，最近我都有兩個朋友因為肝問題離開咗。」

鄭浩南自揭患心律不正

鄭浩南表示自己的心臟都有心律不正的問題：「我同你講緊嘢，隨時會心臟停頓5秒到7秒，但我自己冇事喎，不過年紀大飲食都要注意一啲，要多做運動。」本來他是需要去做手術將四塊心瓣封其中一塊：「但無謂啦！好哋哋做咩要開（刀）咗佢，唯有自己小心啲，飲少啲囉，不過飲起上嚟都會飲，正常一餐自己一個會飲一支烈酒，以前係飲兩三支！」而大宇亦表示他每晚都有飲酒，但只是飲紅酒一杯，為幫助容易入睡。

問鄭浩南會否想識個女友照顧他？他「吓」了一聲說：「有責任嘅！」是否經過與前妻的事不想再負那麼大責任？他說：「有責任嘅，然後隨緣啦，有咪有，冇咪算囉，都咁大年紀邊有話追女仔㗎！」提到現在的女生都好主動，他笑言自己份人好害羞，而且都沒發覺有女生主動埋身：「都係專注做嘢啦，啱啱屋企出咗啲事，件事平息咗啦，要處理嘅處理咗，個女現在都返回我身邊！」他透露女兒剛於馬來西亞讀完大學一年級，今個月便會陪她飛加拿大升讀大學二年級。至於兒子是否也跟隨他生活？鄭浩南則有點避忌說：「唔講啦，係我嘅始終係我，唔想講啲唔應該講嘅嘢，唔想再講嗰個人（前妻）。」會否掛住個仔？他說：「我係人，我有人性，當然會啦！」而鄭浩南未來會多留在香港，但只要什麼地方有工作都會去做，最近他比較喜歡成都，可能因為他喜歡食辣，總之有工作就周圍都會去。