香港文匯報訊 舉世矚目嘅巴黎奧運舉行在即，HOY TV派出多支攝製隊分成不同嘅小隊送上第一手資訊，參與拍攝嘅藝人包括李尚正（阿正）、盧頌恩（妹頭）、蘇韻姿（Andrea）、阮偉倫、黃米高、郭海𣿭等，阿正同妹頭仲發揮「臥底」旅行團嘅專業精神，分享佢哋「中伏」嘅經歷。

阿正與妹頭親身去到巴黎，就大受當地人歡迎，其中有兩位法國男士仲攬妹頭，問到有無試吓近期熱爆嘅Hello Kiss？妹頭就笑謂：「呢度啲人真係好熱情，一來就攬，我都好想試法式啜啜嘅禮儀，不過可能佢哋知道我哋係外國人……」阿正立即踢爆：「因為你猶疑啊。」妹頭忍唔住笑：「無錯，因為我猶豫咗一刻，所以無得啜啜。」到埗巴黎後，阿正就話做多咗好多運動，唔單人精神咗，連去廁所都暢通啲，而妹頭就最愛美食，兩人就不約而同大讚法國生蠔，寧願唔食正餐都要大快朵頤，不過佢哋話晒都係臥底，梗係周圍試唔同嘅美食，結果阿正去咗一間食粉嘅餐廳，發覺有好多味精，而妹頭都試過另一間餐廳嘅洋葱湯，都有好多味精，齊齊中伏。

Andrea同阮偉倫一去到巴黎，就迫不及待去到奧運開幕禮場地附近，因為到埗時有少許落雨，阿倫都擔心開幕禮當天嘅天氣，兩人都祈求不要落雨，現場有好多地方都封路，佢哋又睇到報道指巨星Celine Dion 將會同Lady Gaga為開幕禮演出，身為粉絲嘅Andrea開心到跳起：「呢次係Celine Dion相隔四年首度現場表演，真係超級期待啊。」佢哋又去比賽場館附近，見到塞納河邊兩岸已搭起座椅讓嘉賓現場見證重要一刻。

另外，黃米高同郭海𣿭都分別於巴黎不同地標現場直擊，米高去到凱旋門時發現當地因為遊客太多要封路。佢又巧遇由英國赴當地嘅香港人，梗係唔少得撐港隊，為港隊打氣啦。