李幸倪夥馮允謙作新歌《新牌仔》

香港文匯報訊（記者 阿祖）李幸倪（Gin Lee）昨日推出新歌《新牌仔》，歌中帶來「成長」課題，作曲由Gin跟好友馮允謙、陳考威及黃兆銘一起創作。

原來「成長」這個主題，一直在Gin的袋中藏着多年，她記得讀大學時，同班同學跟她分享家庭提到爸爸做得不好，她反過來安慰同學，即使做爸爸的也在學習中，做得不好應給予體諒和機會。她謂小時候總覺得大人應該什麼都會，長大後才知並非如此：「有時候佢哋會犯錯或者唔識，所以人生就係要不停學習，冇人永遠都一百分。」她續說：「人生去到唔同嘅階段，分唔同嘅工，每一個階段做嘅每一個選擇，當時可能會令到你不知所措、會令到你覺得好難嘅一啲新嘅課題，但你要去學。」

憶求學壓力 每晚夢見考試

Gin直言是時間和緣分促成她跟馮允謙合作，她指大家認識多年，閒聊間會提到寫歌，直到今年二人合作拉闊音樂會後，終於成事，但《新牌仔》本來是不存在，原先是寫好另外一首歌：「當時我好興奮有另一個諗法，跟住我就成個故事講咗一次畀大家聽，大家好有感覺，佢哋都覺得呢個題材有趣，《新牌仔》就喺咁嘅情況下誕生。」歌詞再次找來黃偉文相助，Gin坦言歌詞有很多擊中她的小心臟：「首先一定係父母嗰一part，佢知道我同屋企人感情好好，我好想孝順父母，但可能有啲時候做唔到，因為自己要離鄉別井追求自己想要嘅嘢，歌詞有句『但對父母親 別提及傷口』；第一句『大踏步 踏出氧氣罩』都好有感覺，因為我係七星女，唔足月出世，一出世就要瞓氧氣箱一個月先可以出嚟。」

MV其中一個場景是禮堂，Gin表示讀書時是好容易有好大壓力，試過每晚都發同一個夢，夢見自己考試沒溫書好驚，但今次MV的情景是開心溫馨地與同學一齊打排球、吃東西、傾偈、玩田徑。