92歲胡楓澳門開Show破亞洲最老紀錄　希望95歲挑戰健力士

香港文匯報訊（記者 子棠）92歲的胡楓（修哥）將於5月18日在澳門倫敦人綜藝館舉行《無限楓騷演唱會 2024》，繼前年以90高齡五度踏上紅館、成為最年長舉辦紅館騷的藝人，今次更破了亞洲的演唱會紀錄，而下一個目標是打破健力士世界紀錄。而修哥開唱，更獲老、中、青三代藝人齊恭賀，足見地位超然！

修哥在演藝界得高望重，今日在有關記者會上，大會播放群星祝賀修哥的片段，當中有成龍、曾志偉、黃百鳴、薛家燕、陳淑芬、黃子華、Maria Cordero、林峯、黃劍文、組合 XiX等；還有大會代表陳淑芬和何麗全向修哥送上以其肖像繪畫的插畫。何麗全更公布將有逾20位嘉賓到澳門撐修哥，包括張家輝、羅蘭 、Maria Cordero、 Joe Junior、顧紀筠、 鄭丹瑞、森森、班班 、蘇永康、黎瑞恩、張繼聰、鄧麗欣、周柏豪、王菀之、胡杏兒、 曾比特、龍婷、譚輝智、顏米羔、阮兆祥、王祖藍、李思捷等。向來風趣的修哥笑謂：「我唔理咁多，我一定要唱番咁上，叫監製唔好畀少我唱呀，哈哈！我都好開心和感謝有咁多嘉賓，其實所有嘉賓都係大會邀請，我邀請過一次、兩次，都唔好意思再邀請，就算張家輝係我契仔都唔好意思，反而係他很好，每次都自己投案，有次仲話我開演唱會不預他係唔啱數。」

席間，修哥表示今次將打破最年長舉行演唱會的亞洲紀錄，笑言下一步就是打入健力士世界紀錄：「聽聞好似95歲就可以破到紀錄，不過我好少主動要求，都係順其自然，我都係70歲才第一次上紅館，上次再開紅館騷其實都唔敢諗，每次都係人哋邀請，總之一切隨緣。」