香港文匯報訊（記者 梁靜儀）羅子溢、陳自瑤（Yoyo）、黎諾懿、賴慰玲、羅天宇及王敏奕主演的無綫劇《婚後事》，自播出後引爆網絡熱話，劇集播出兩集後，電視劇評分軟件「豆瓣」已開出了8.3分的高評分，之後隨着劇集熱播，分數一直持續攀升，更一度衝至8.8分，相當厲害。

為了令觀眾更深入了解6位主角拍攝《婚後事》時的心路歷程及點滴，myTV SUPER日前推出一系列主演對談訪問，打響頭炮的是飾演張明芯的陳自瑤Yoyo及飾演潘善仁的羅子溢。

二人於第五集的激情親熱場成了網絡熱話，對於之前甚少拍親熱戲的Yoyo來說，她坦言拍攝時對於整個劇組、尤其監製及編審是投以百分百信任票：「所以我從來冇質疑過個劇本，我應該係演少啲吖，定唔好演到咁，我哋呢個劇會講好多感情好豐富嘅Moment，就好似善仁同明芯即將要分開、又經歷咗咁多嘢，所以咁樣嘅場口或感情戲、先可以帶到佢同前夫嗰種感覺，我只能盡力調節心態去演好。」之後Yoyo竟拋波給子溢，並笑謂：「當然因為你呢個情場老手，真係帶得我好。」子溢聞言先是一秒尷尬，之後再搞笑畀晒反應謂：「我從來冇質疑過自己嘅能力。」

每日一喊難抽離

Yoyo續指拍攝《婚後事》時很難抽離，更瘋狂至「每日一喊」：「之前拍劇我可以好快走返出嚟，但呢套劇我同你（指子溢）都真係最多情緒戲同喊戲，個情緒困得太耐，真係每一日都有喊戲，就算最簡單嘅戲，都梗有一場（喊戲）。但我覺得係好事，因為我已經喺個角色，我唔想太抽離，我都驚自己入唔返去。」子溢被Yoyo追問「對潘善仁的共鳴位」，他指出有兩大共通點：「我會將所有責任都攬晒上身，同埋我會沉溺喺自己嘅反思入面，成日自己諗嘢，又唔係好擅於表達，可能有時係男人嘅自尊心作祟，想自己諗方法去解決同安慰自己。」子溢續指與太太楊茜堯由拍拖到結婚也有十年，處理角色時亦感受很深：「真係覺得婚姻有高有低，會有唔啱嗌交嘅時候，三日一小嗌，七日一大拗，可能為咗小朋友都會有啲分歧。同埋亦都明白到一個男人結咗婚之後，係需要一啲空間去沉思，未必想逃避，可能係一個情緒嘅抒發。」