香港文匯報訊（記者 梁靜儀）TVB歌唱真人騷《中年好聲音2》將於三月底舉行總決賽，10強參賽者包括古淖文、顏米羔、安雅希、劉威煌、黃劍文、譚輝智、沈宗賢、陳俞霏、林若盈和陳蒨葶，今日到電視城出席記者會分享備戰狀況，暫時得分最高的古淖文表示「九強戰」會用120%努力迎戰，而另一大熱人選顏米羔就表示因身體弱，所以會多爭取休息時間保養身體。

古淖文受訪時表示能晉身十強自己都估不到，因大家也很犀利，對於拿到MVP更有光宗耀祖的感覺：「第一次Solo攞九字頭（分數），覺得好正，上一次MPV係團賽唱，今次第二次攞意義重大，都好多謝谷婭溦激勵鞭策我。」至於可有信心登頂？他笑稱不敢想，只希望每次為大家帶來新鮮感，讓大家見到他的進步。

另一大熱人選顏米羔，轉換了新髮型外，影相時不單舉勝利手勢又做可愛甫士。他笑說：「難得有機會有人服侍，自己又唔識Set頭，所以想改變一下，配合返啲歌，每個環節都想帶啲新鮮感俾大家，（係咪想殺氣冇咁重？）冇得改，呢個唔係殺氣係信心。」

問到古淖文是否最大勁敵？顏米羔就指則全部參賽者都是朋友：「Enjoy大家各望住目標衝刺，最緊要享受過程，但唔不會讓奬，如果輸畀古淖文都會心服口服。」對於有網民覺得賽際不公平？古淖文聞言即搶着說：「冤枉，自己唱得好辛苦。」顏米羔就唔認為有唔公平：「喺台上唔似電影咁有take2，唱幾分鐘就要發揮得最好，人哋至會睇到，否則就算練習時候就算幾好也沒有用，你企喺台上唔出聲唔通又會比分？冇可能，每個歌手上到台，能唔能夠將自己最想做到嘅嘢做出嚟，如果稍為做得唔好，後果就係等下次機會。」古淖文亦附和說：「我百分百同意顏米羔講法。」

至於陳蒨葶踢走大熱門鄭梓浩躋身10強，卻被網民指賽果造馬不公平，指她唱楊千嬅的歌似鄭秀文(Sammi)及冇台型壓不到場，不應入10強。

對此陳蒨葶就聲不覺得大會造馬，又指自己都曾兩度跌落危險區，情況很驚險，每次心情也大起大落及百感交集，對於上場比賽，她形容有過到初一過唔到十五、有凶多吉少的感覺，又指比賽的時候心情很低落，自責發揮不是最好，故已想定了謝詞，「我想我好姊妹陳燕娜入到，其實邊個走都唔捨得，寧願自己走，所以其實都好驚險，好似死過翻生。」

她又稱每個人都有自己的優點和特色，她又指作為參賽者是被動的，很多謝評審揀了自己：「喺邊個回合走都唔代表係差，只係大家實力都太勁，好多謝所有觀眾支持我哋，當然會有人鍾意有人唔鍾意，亦証明大家都好鍾意鄭梓浩，係認同咁多位實力先有呢個反應。」至於指她唱歌似Sammi，她說：「可能Sammi係自己偶像，當然唱歌方式會有少少似，現時喺唱歌方面已慢慢開始找返自己的唱法，務求將最好的帶給觀眾。」